કેરળની હાઇકોર્ટે ગુરુવારે ઇન્ટરનેટના ઉપયોગને 'મૌલિક અધિકાર' બતાવ્યો. કોર્ટે ઐતિહાસિક ચૂકાદો સંભળાવતા કહ્યું કે ઇન્ટરનેટનો ઉપયોગ બંધારણ હેઠળ આપવામાં આવેલા શિક્ષણના અધિકાર અને ખાનગીપણાના અધિકારનો જ એક ભાગ છે.
હોસ્ટેલમાં વિદ્યાર્થીનીઓના મોબાઇલ ફોન ઉપયોગ પર લાગ્યો હતો પ્રતિબંધ
કોર્ટે કહ્યું- મોબાઇલ પર પ્રતિબંધ અનુચ્છેદ 19 (1) (એ) હેઠળ મૌલિક અધિકારનું ઉલ્લંઘન
કેરળ હાઇકોર્ટનો આ ચૂકાદો જસ્ટિસ પી વી આશાની આગેવાની વાળી પીઠે એક અરજી પર સંભળાવ્યો હતો. જેમા એક વિદ્યાર્થીનીએ ગર્લ્સ હોસ્ટેલમાં છોકરીઓના મોબાઇલ ફોનના ઉપયોગ પરના પ્રતિબંધને અયોગ્ય ઠેરાવ્યો હતો.
અરજીકર્તા કોજ્ઞિકોડના ચેલાનુર સ્થિત શ્રી નારાયણ કોલેજની ફાહિમા શિરિન છે. બીએ અંગ્રેજીના થર્ડ સેમેસ્ટરની વિદ્યાર્થીની ફાહિમાએ મોબાઇલના ઉપયોગ પર કોલેજ હોસ્ટેલથી કાઢી મુકવા પર આ અરજી દાખલ કરી હતી. હોસ્ટેલના નિયમો મુજબ, વિદ્યાર્થીઓના સાંજે 6 વાગ્યાથી રાત્રે 10 વાગ્યા સુધી મોબાઇલના ઉપયોગ પર પ્રતિબંધ લગાવામાં આવ્યો છે.
અરજીકર્તાએ આ પ્રતિબંધ વિરુદ્ધ અન્ય વિદ્યાર્થીનીઓ સાથે વિરોધ પ્રદર્શન પણ કર્યું હતું. ફાહિમાનું કહેવું છે કે મોબાઇલ ફોનના ઉપયોગ પર પ્રતિબંધથી તેમનો અભ્યાસ પ્રભાવિત થાય છે. કેમકે ઇન્ટરનેટ દ્વારા ઘણી માહિતી પ્રાપ્ત કરી શકાય છે.
સુનાવણી દરમિયાન અરજીકર્તાના વકીલ લેગિથ ટી કોટ્ટક્કલે કોર્ટમાં કહ્યું કે યૂનાઇટેડ નેશન હ્યૂમન રાઇટ્સ કાઉન્સિલે પણ 2016માં ઇન્ટરનેટના ઉપયોગને માનવ અધિકાર જાહેર કર્યો છે. હાઇકોર્ટે આ મામલે સ્વીકાર્યું કે મોબાઇલ પર પ્રતિબંધ ભારતીય બંધારણના અનુચ્છેદ 19 (1) (એ) હેઠળ બોલવા અને અભિવ્યક્તિની સ્વતંત્રતાના મૌલિક અધિકારનું ઉલ્લંઘન કરે છે. વિદ્યાર્થીનીના જીવનમાં ઇન્ટરનેટનો ઉપયોગ જરૂરી છે કેમકે વિદ્યાર્થી ઘણી જરૂરી માહિતી આ પ્લેટફોર્મનો ઉપયોગ કરી મેળવતા હોય છે.