સલામ / સરકાર અને ખાનગી શાળા સંચાલકો કંઇક શીખો, એક રીક્ષા ચાલકે વિદ્યાર્થીઓની લાખોની ફી માફ કરી

• કોરોનાકાળમાં રીક્ષા ચાલકની માનવતા
• સ્કૂલો બંધ રહી તો માફ કરી રીક્ષા ફી 
• સ્કૂલ સંચાલકોએ કાંઈક પ્રેરણા લેવાની જરૂર  

'પૈસા હાથનો મેલ છે, જે આજે છે અને કાલે નથી' આ સુંદર ઉક્તિ આજે ભાવનગરના એક રીક્ષા ચાલકે સાર્થક કરી બતાવી છે. જેણે આ મહામારીના સમયમાં હજાર કે પાંચ હજાર નહીં પરંતુ 1 લાખથી પણ વધુ રૂપિયાનું રીક્ષા ભાડું જતું રહ્યું છે. ઈમરાન બેલીમ નામના રિક્ષા ચાલક જેઓ છેલ્લા 13 વર્ષથી શાળાઓમાં રીક્ષાની વર્ધિ ભરે છે. રીક્ષા દ્વારા જ પોતાના પરિવારનું ગુજરાન ચલાવે છે. પરંતુ આ લૉકડાઉનના સમયમાં ત્રણ મહિના સુધી રીક્ષા બંધ રહી. એટલે સ્વાભાવિક છે કે, તેમની આવક પણ બંધ રહી. છતાં તેમણે પોતાની રીક્ષામાં આવતા બાળકોની ત્રણ મહિનાની ફી માફ કરી દીધી.

3 મહિનાની 1.5 લાખ રૂપિયા ફી કરી માફ

મહત્વનું છે કે, ઈમરાન ભાઈની પોતાની રીક્ષા દ્વારા વિદ્યાર્થીઓને શાળાએ લઈ જાય છે. ફરી ઘર સુધી સહિસલામત મુકી જાય છે. આ માટે તેમને મહિને 35 હજાર જેવું વળતર મળે છે. પરંતુ તેમણે અહીં માનવતા બતાવતા ત્રણ મહિનાની ફીના અંદાજીત 1 લાખને 5 હજાર રૂપિયા માફ કરી દીધા છે. તેમના આ પગલાથી વાલીઓ અને વિદ્યાર્થીઓ પણ ખુબ પ્રભાવિત થયા છે.  

હકીકતમાં ઈમરાનભાઈના આ નિર્ણયમાંથી ખાનગી શાળાના સંચાલકોએ અને સરકારે કાંઈક પ્રેરણા લેવી જોઈએ. કારણ કે, એક સામાન્ય રીક્ષા ચાલક લાખો રૂપિયાની ફી માફ કરી શક્તો હોય. તો આ સંસ્થાઓ તો કરોડોની માલિક છે. એક સત્રની ફી નહીં લે તો પણ તેમનો વાળ વાંકો નહીં થાય. ઈમરાન ભાઈના આ નિર્ણયને VTV આવકારે છે. VTV તેમને સલામ કરે છે.