સુશાંત સિંહ રાજપૂતની મોત મામલે ફિલ્મમેકર સંદીપ સિંહ હવે સવાલોના ઘેરામાં આવી ગયો છે. સંદીપ સિંહે પોતે સુશાંતનો નજીકનો મિત્ર હોવાનો દાવો કરે છે, પરંતુ સુશાંતના પરિવાર સંદીપને ન ઓળખવાની અને સુશાંત સાથે તેની નજીકની મિત્રતા અંગે કોઈ જાણકારી ન હોવાની વાત કહી છે. ત્યારે હવે સુશાંતની ગર્લફ્રેન્ડ રિયા ચક્રવર્તીએ પણ સંદીપ સિંહના દાવાની પોલ ખોલી છે.
સુશાંતના કેસમાં હવે નવો ખુલાસો
સંદીપ સિંહને લઈને રિયાએ જણાવી ચોંકાવનારી વાત
રિયાએ કહ્યું તે સંદીપ સિંહને જાણતી નથી
રિયાએ એક ઈન્ટરવ્યૂમાં કહ્યું કે, તે સંદીપ સિંહને ઓળખતી નથી. એક્ટ્રેસે કહ્યું- હું સંદીપને નથી જાણતી અને જો તે સુશાંતને પોતાનો સારો મિત્ર માને છે તો છેલ્લા દોઢ વર્ષથી તે ક્યાં હતો. મેં ક્યારેય તેનું નામ સાંભળ્યું નથી અને તે ક્યારેય ઘરે પણ આવ્યો નથી. હું ગેરંટી આપું છું કે, સુશાંતની કોલ લોગમાં પણ સંદીપ સિંહનું નામ નહીં હોય.
રિયાએ કહ્યું- આ એકદમ પાયાવિહોણા આરોપ છે અને સાવ ખોટી વાત છે. આવી કોઈ હાર્ડ ડ્રાઇવ વિશે મને ખબર નથી. જ્યાં સુધી હું હતી ત્યાં સુધી કોઈ આવ્યું નથી. મારા ગયા બાદ સુશાંતની બહેન જે 8 જૂનથી 13 જૂન સુધી તેની સાથે હતી, તેને આ અંગે ખબર હોત કે આવું કંઈ થયું છે. મને લાગે છે કે મારા વિરૂદ્ધ ફરી એક નવી કહાની લખાઈ રહી છે. જે રીતે રોજ એક નવી કહાની લખાય છે, જે સંપૂર્ણ રીતે પાયાવિહોણી હોય છે.