સુશાંત સિંહ રાજપૂત કેસમાં રિયા ચક્રવર્તીની NCBએ ધરપકડ કરી લીધી છે. મહત્વનું છે કે છેલ્લાં ત્રણ દિવસથી NCB દ્વારા રિયાની પૂછપરછ કરાઈ રહી હતી અને આજે તેના ધરપકડના ભણકારા વાગી રહ્યાં હતાં અને આખરે તેની ડ્રગ્સ કેસમાં ધરપકડ કરાઈ છે.
સુશાંત કેસમાં સૌથી મોટી ધરપકડ
શોવિક બાદ રિયા ચક્રવર્તીની થઇ ધરપકડ
ઘણા સમયથી રિયા CBI, NCB અને મુંબઇ પોલિસથી બચતી ફરતી હતી પરંતુ હવે તે એનસીબીના સકંજામાં આવી ગઇ છે. સુશાંત સિંહ રાજપૂત કેસમાં એક બાદ એક નવા વળાંકો આવી રહ્યાં હતા ત્યારે એક્ટરના ડેથ કેસમાં રિયા ચક્રવર્તીની ધરપકડ કરવામાં આવી છે.
14 જૂન 2020ના રોજ બોલિવૂડ અભિનેતા સુશાંત સિંહ રાજપૂતે તેમના બાન્દ્રા સ્થિત ઘરમાં આત્મહત્યા કરી લીધી હતી. કહેવામાં આવી રહ્યું હતુ કે સુશાંતે ડિપ્રેશનમાં આવીને આત્મહત્યા કરી હતી. બાદમાં સુશાંતના પિતા કેકે સિંહે રિયા વિરુદ્ધ ફરિયાદ નોંધાવી હતી. જેથી મુંબઇ પોલિસથી લઇને સમગ્ર મામલો CBI સુધી પહોંચ્યો હતો.
થશે મેડિકલ ટેસ્ટ
રિયાની ધરપકડ બાદ રિયાને મેડિકલ ટેસ્ટ માટે લઈ જવામાં આવશે. મેડિકલ ટેસ્ટ બપોરે સાડા ચાર વાગ્યાની આસપાસ કરવામાં આવશે. ઉલ્લેખનીય છે કે આજે રિયાની એનસીબી ઑફિસમાં ત્રીજા દિવસે પૂછપરછ કરવામાં આવી હતી. ડ્રગ્સના કેસમાં રિયાનો ભાઈ શોવિક પહેલેથી જ એનસીબી કસ્ટડીમાં છે.
શોવિકની થઇ હતી ધરપકડ
શોવિક ચક્રવર્તી કે જે રિયા ચક્રવર્તીનો ભાઇ છે તેની પણ NCBએ ધરપકડ કરી હતી. સાથે જ સુશાંતના હોમ મેનેજર સેમ્યુઅલ મિરાન્ડાની પણ ધરપકડ કરવામાં આવી હતી. બાદમાં જ્યારે શોવિક અને મિરાન્ડાની પૂછપરછ કરવામાં આવી ત્યારે રિયા ચક્રવર્તીનું નામ પણ સામે આવ્યું હતું.
રિયાની પૂછપરછમાં બોલીવુડના 25 હસ્તીઓના નામ જણાવ્યા : સૂત્ર
રિયા ચક્રવર્તીના ઘરેથી NCBને જે ઇલેક્ટ્રોનિક્સ ડિવાઇસીઝ મળ્યાં હતાં તેનાથી ઘણા મોટા રહસ્યો ખૂલ્યાં છે. તપાસ અનુસાર, રિયાનું ડ્રગ્સ સર્કલ વર્ષ 2017-2018-2019માં વધુ સક્રિય હતું. તપાસ એજન્સીઓ દ્વારા રિયાના ઘરેથી ઇલેક્ટ્રોનિક ડિવાઇસ મળી આવતા ડ્રગ્સ સર્કલને લગતા ફોટોગ્રાફ્સ, વીડિયો, વોટ્સએપ ચેટ્સ, એસએમએસ મળી આવ્યા છે. બોલિવૂડના ઘણા મોટા ચહેરા પણ દેખાયા છે. જેમાં આશરે 25 જેટલા બોલીવુડના ચહેરાઓના નામ સામે આવ્યા હોવાનું જાણવા મળી રહ્યું છે.
રિયાની ચાલી 3 દિવસ પૂછપરછ
સતત 3 દિવસ સુધી નાર્કોટિક્સ કન્ટ્રોલ બ્યુરોએ રિયાની પૂછપરછ કરી અને તેમાં રિયાને પ્રશ્નો પૂછવામાં આવ્યા હતા. 3 દિવસની કડક પૂછપરછ બાદ રિયાની આજે ધરપકડ કરવામાં આવી છે. ઔપચારિક જાહેરાત બાકી છે.