સુશાંતસિંહ રાજપૂત કેસ સંબંધિત ડ્રગ્સ કેસમાં નાર્કોટિક્સ કંટ્રોલ બ્યૂરો (NCB)એ રિયા ચક્રવર્તીની પૂછપરછ કરી હતી.
રિયા બપોરે સાડા બાર વાગ્યાની આસપાસ NCB ઓફિસ પહોંચી હતી. ત્યારબાદ NCBના અધિકારીઓ સતત તેની પૂછપરછ કરી રહ્યા હતા. પૂછપરછ લગભગ સાડા છ કલાક ચાલી હતી.
સૂત્રોનું કહેવું છે કે, પૂછપરછ દરમિયાન રિયાએ કબૂલાત કરી છે કે, સુશાંતના ઘરે ડ્રગ્સ આવતું હતું. પરંતુ તે ઘણા પ્રશ્નોના સ્પષ્ટ જવાબ આપી શકી નહીં. સૂત્રોનું કહેવું છે કે, NCB પાસે મજબૂત પુરાવા છે જેના આધારે રિયાએ સુશાંતના ઘરે ડ્રગ્સ આવવાનું કબૂલ્યું છે.
સુશાંતે weed સિવાય કોઈ ડ્રગ્સ લીધું નથી: રિયા
રિયાએ NCBને જે નિવેદન આપ્યું છે તે મુજબ, સુશાંતે રિયાને કહ્યું હતું કે તે શોવિક અને સેમ્યુઅલ દ્વારા weed (ગાંજો) મંગાવવા અંગે માહિતી મેળવે. રિયાએ કહ્યું કે, તેની જાણકારી મુજબ સુશાંતે weed સિવાય કોઈ ડ્રગ્સ લીધું નથી. તેને નથી ખબર કે શોવિકે ડ્રગ્સ લીધું છે કે નહીં. તેને તેની કોઈ જાણકારી નથી. રિયાના જણાવ્યાં મુજબ, સુશાંતને ખબર હતી કે સેમ્યુઅલ અને શોવિકની ઓળખાણમાં કેટલાક લોકો એવા છે જે તેના માટે weedની વ્યવસ્થા કરી શકે તેમ છે. હું સુશાંતના કહેવા પર એક કે બે વખત ડ્રગ્સ મંગાવવાના કામમાં સામેલ થઈ હતી. આ ઉપરાંત સુશાંત સીધેસીધું સેમ્યુઅલ પાસે પણ ડ્રગ્સ મંગાવતો હોવાનો દાવો રિયાએ કર્યો છે.
રિયાના જવાબથી NCB અસંતુષ્ટ
રિયાના ઘણા પ્રશ્નોના જવાબથી NCB સંતુષ્ટ નથી, તેથી જ આજે ફરી તેને પૂછપરછ માટે પાછી બોલાવવામાં આવી છે. આ કેસ સાથે સંકળાયેલા તપાસ અધિકારી સમીર વાનખેડેએ જણાવ્યું હતું કે રિયા આજે મોડી પહોંચી હતી, તેથી તપાસ પૂરી થઈ શકી નથી.
આજે સવારથી જ NCB રિયાની પૂછપરછ કરી રહી છે અને સૂત્રોનો દાવો છે કે તેની વિરુદ્ધ NCB પાસે ઘણા મજબૂત પુરાવા હોવાથી ગમે તે ઘડીએ રિયાની ધરપકડ થવાની પણ સંભાવના છે.