આવક / ગુજરાત ટેલિકોમ ઉદ્યોગમાં Jio બની સુપર પાવર; જૂન ક્વાર્ટરમાં આવક વધીને આટલા કરોડ થઇ

ટેલિકોમ રેગ્યુલેટરી ઓથોરિટી ઓફ ઇન્ડિયા (TRAI) એ જાહેર કરેલા આંકડા મુજબ, તમામ ટેલિકોમ કંપનીની AGR (એડજસ્ટેડ ગ્રોથ રેવેન્યૂ) અથવા આવક પાંચ ટકા ઘટીને કુલ રૂ.1880 કરોડ રહેવા પામી છે. 31 માર્ચના રોજ પૂરા થયેલા ક્વાર્ટરની સરખામણીએ માત્ર Jioએ AGRમાં વધારો નોંધાવ્યો છે.

જૂન ક્વાર્ટરમાં Jioની આવક 16 ટકા વધીને રૂ.920 કરોડ થઈ

જૂનમાં પૂરા થતાં ત્રિમાસિક ગાળામાં Jioની આવક 16 ટકા વધીને રૂ.920 કરોડ થઈ છે. એરટેલ અને વોડાફોન-આઇડિયાની ગુજરાતની આવક આ સમયગાળા દરમિયાન અનુક્રમે 7.5 ટકા અને 25 ટકા ઘટી છે. ગુજરાતમાં 30 જૂનના રોજ પૂરા થતાં ત્રિમાસિક ગાળામાં એરટેલની આવક રૂ.271 કરોડ જ્યારે વોડાફોન-આઇડિયાની આવક 587.52 કરોડ નોંધાઈ હતી.

ગુજરાતમાં ટેલિકોમ ઉદ્યોગની આવકમાં જિયોનો હિસ્સો 49 ટકા

ટ્રાઈના અહેવાલમાં BSNLની નાણાકીય સ્થિતિનો ઉલ્લેખ કરવામાં આવ્યો નથી, પરંતુ અહેવાલમાં એમ જણાવવામાં આવ્યું છે કે, ગુજરાતમાં ટેલિકોમ ઉદ્યોગની આવકમાં જિયોનો હિસ્સો 49 ટકા, ત્યારબાદ વોડાફોન-આઇડિયાનો હિસ્સો 32 ટકા અને એરટેલનો હિસ્સો 14 ટકા રહ્યો છે.

પરાગ દવે, અમદાવાદ