ગુજરાતમાં સોમવારે અરવિંદ કેજરીવાલે AAPના પ્રદેશ કાર્યાલયનો પ્રારંભ કરાવ્યો અને સ્થાનિક આગેવાનો સાથે મુલાકાત યોજ્યા બાદ દિલ્હી જઈને ગુજરાતના ધારાસભ્યને આપમાં જોડાવાનું આમંત્રણ આપતા રાજકારણ ગરમાયું છે.
આપમાં જોડાવા માટે અમરીશ ડેરને કેજરીવાલનું આમંત્રણ
અમરીશ ડેરે કેજરીવાલનો ફોન આવ્યો હોવાની વાતને સ્વીકારી
દિલ્હી પરત ફરતા કેજરીવાલે ફોન કરીને ડેર સાથે કરી હતી ચર્ચા
મળતી વિગતો પ્રમાણે, દિલ્હીના મુખ્યમંત્રી અને આમ આદમી પાર્ટીના વડા અરવિંદ કેજરીવાલ સોમવારે ગુજરાતની એક દિવસીય મુલાકાતે હતા. આ દરમિયાન તેમણે સ્થાનિક આગેવાનો સાથે બેઠક કરી તો ગુજરાતના પત્રકાર ઇસુદાન ગઢવીને ખેસ પહેરાવીને પાર્ટીમાં આવકાર્યા. આ સાથે જ તેમણે પત્રકાર પરિષદ યોજીને ગુજરાત સરકાર પર પ્રહાર કર્યા અને કહ્યું કે, ગુજરાતના ખેડૂતો આપઘાત કરે છે અને જનતા પરેશાન છે.
અમરીશ ડેરને આપમાં જોડાવાનું આપ્યું આમંત્રણ
તો અમદાવાદ વાદ ખાતે આમ આદમી પાર્ટીના પ્રદેશ કાર્યાલયનો પ્રારંભ પણ કરાવ્યો હતો. જો કે, મોડી સાંજે દિલ્હી પહોંચ્યા બાદ રાજુલાના કોંગ્રેસના ધારાસભ્ય અમરીશ ડેરને ફોન કરીને આપમાં જોડાવાનું આમંત્રણ આપતા રાજકારણમાં ગરમાવો જોવા મળ્યો છે.
AAPના આમંત્રણ મુદ્દે વિચારીશ : ડેર
VTV સાથેની વાતચીતમાં કોંગ્રેસી ધારાસભ્યએ જણાવ્યું કે, ગુજરાત આવેલા અરવિંદ કેજરીવાલે દિલ્હી પહોંચ્યા બાદ કોલ કરીને રાજુલા રેલવે જમીન વિશે પણ વાત કરી હતી અને AAPમાં જોડાવા માટે આમંત્રણ પણ આપ્યું હતું. AAPના આમંત્રણ મુદ્દે વધુમાં તેમણે કહ્યું કે, હું આગળની રણનીતિ અંગે વિચારીશ, હાલ હું રેલવે સામે આંદોલન કરી રહ્યો છું.
કેજરીવાલનું મોટું એલાન
પત્રકાર પરિષદને સંબોધન કરતા દિલ્હીના મુખ્યમંત્રીએ મોટી જાહેરાત કરી હતી. કેજરીવાલે કહ્યું કે, આગામી સમયમાં ગુજરાત વિધાનસભાની ચૂંટણી આવી રહી છે ત્યારે AAP 2022ની ચૂંટણીમાં 182 બેઠક પર ચૂંટણી લડશે. ગુજરાત વિધાનસભાની દરેક બેઠક પર આમ આદમી પાર્ટીના ઉમેદવારને ઉભો રાખવામાં આવશે.
ગુજરાતમાં બદલાવ લાવવાનો છે : ઈસુદાન ગઢવી
AAPમાં વિધિવત્ રીતે જોડાયા બાદ બોલ્યાં કે ગુજરાતમાં બદલાવ લાવવાનો છે અને તેની માટે જ રાજકારણમાં આવ્યો છું. લોકો કહેતા હતા કે મતદાન તો કરવું છે પરંતુ ગુજરાતમાં એવો કોઈ ત્રીજો વિકલ્પ નથી એટલે કોને મતદાન કરીએ. ત્યારે હું કહું છું કે તમારી સામે હવે એક પ્રમાણિક ત્રીજો વિકલ્પ હું છું. ગુજરાતની જનતાને આહ્વાન કરું છું કે સાથ આપે. તેમણે કહ્યું કે ભાજપ ગુજરાતમાં લોકપ્રિય નથી પરંતુ તેની સામે કોઈ વિકલ્પ ન હતો.