બર્બરતા / પાર્કિંગ વિવાદમાં રિટાયર્ડ પોલીસ જવાને જવાનજોધ દીકરો ગુમાવ્યો, રસ્તાની વચ્ચે ઈંટો મારી-મારીને હત્યા 

• ઉત્તર પ્રદેશના ગાઝિયાબાદમાં પાર્કિંગની બાબતે યુવકની હત્યા 
• નિવૃત પોલીસ કર્મચારીના પુત્રને કેટલાક ઇસમોએ  ઈંટો મારી-મારીને પતાવી દીધો 
• ઘટના સાથે જોડાયેલ એક વીડિયો સોશિયલ મીડિયા પર વાયરલ 

ઉત્તર પ્રદેશના ગાઝિયાબાદમાં એક સનસનીખેજ ઘટના સામે આવી છે. પાર્કિંગની નજીવી તકરાર બાદ 4-5 અજાણ્યા હુમલાખોરોએ એક યુવકને ઢોર માર માર્યો હતો. મૃતક નિવૃત પોલીસ કર્મચારીનો પુત્ર છે. પોલીસે અજાણ્યા હુમલાખોરો સામે ગુનો નોંધ્યો છે. આરોપીઓની શોધખોળ જોરશોરથી ચાલી રહી છે. 

ગાઝિયાબાદમાં બનેલી આ ઘટનાનો ભોગ બનેલો યુવક અરુણ (35) ટીલા મોડ પોલીસ સ્ટેશન વિસ્તારના જાવલી ગામનો રહેવાસી હતો. મંગળવારે રાત્રે લગભગ 9.30 વાગ્યે તે તેના 2 મિત્રો સાથે જમવા ગયો હતો, તે દરમિયાન કાર પાર્કિંગ બાબતે કેટલાક અજાણ્યા યુવકો સાથે તેની તકરાર થઈ હતી. વિવાદ એટલો વધી ગયો કે 5-6 અજાણ્યા યુવકોએ અરુણને માર મારવાનું શરૂ કરી દીધું. 

ગંભીર હાલતમાં હોસ્પિટલ લઈ ગયા 

આ દરમિયાન અરુણ ગંભીર રીતે ઘાયલ થયા બાદ તેને તાત્કાલિક ઈજાગ્રસ્ત હાલતમાં દિલ્હીની જીટીબી હોસ્પિટલમાં લઈ જવામાં આવ્યા હતા. જ્યાં તબીબોએ પ્રાથમિક તપાસ બાદ ઘાયલ અરુણને મૃત જાહેર કર્યો હતો.ઘટના બાદ આરોપી સ્થળ પરથી ફરાર થઈ ગયો હતો. 

આ તરફ હવે આ ઘટના સાથે જોડાયેલ એક વીડિયો પણ સોશિયલ મીડિયા પર વાયરલ થઈ રહ્યો છે, જેમાં એક યુવક જમીન પર પડેલા યુવક પર ઈંટ વડે હુમલો કરી રહ્યો છે. ઘટના બાદ પોલીસે સંબંધીઓની ફરિયાદના આધારે ગુનો નોંધી આરોપીની શોધખોળ શરૂ કરી છે.