ફરિયાદ / તમારી મદદ કરુ? ગઠિયાએ વૃદ્ધાનું ડેબિટ કાર્ડ બદલી ઉપાડી લીધા 42 હજાર રૂપિયા

મેમનગર વિસ્તારના પંચશીલ ટાવરમાં રહેતા નિવૃત અધિકારી કિરીટરાજ સોલંકીએ ઘાટલોડિયા પોલીસ સ્ટેશનમાં ગઠિયા વિરુદ્ધ છેતરપિંડીની ફરિયાદ કરી છે. કિરીટરાજ નિવૃત્ત થયા પછી તેમનું પેન્શન નારણપુરા ખાતેના પ્રગતિનગરના શાંતિ આર્કેડમાં આવેલ એસબીઆઈમાં જમા થાય છે. ગત તારીખ પ જૂનના કિરીટરાજને પૈસાની જરૂર હોવાથી  તેઓ ડેબિટકાર્ડ લઇ પારસનગર પાસે આવેલા વિનાયક પેટ્રોલ પંપ ખાતેના એસબીઆઈ એટીએમમાં રૂપિયા ઉપાડવા માટે ગયા હતા.

કિરીટીરાજ ડેબિટકાર્ડથી એટીએમમાં રૂપિયા ઉપાડવાની પ્રોસેસ કરતા હતા ત્યારે તેમની પાછળ એક યુવક ઊભો હતો. ડેબિટકાર્ડ સ્વાઇપ કરતી વખતે યુવકે કિરીટરાજને કહ્યું કે કાકા, તમને મદદ કરું. તમારું એટીએમકાર્ડ મને આપો. આમ કહી તેમની પાસેથી ડેબિટકાર્ડ લઇ તેમને મદદ કરી હતી, જેમાં કિરીટરાજના ડેબિટકાર્ડનો પિન નંબર જાણી લીધો હતો.

યુવક કિરીટરાજની નજર ચૂકવીને બીજી કોઇ વ્યકિતનું ડેબિટકાર્ડ આપીને જતો રહ્યો હતો. બીજા દિવસે સવારે કિરીટરાજે તેમના મોબાઇલમાં આવેલો મેસેજ ચેક કર્યો હતો ત્યારે જાણવા મળ્યું હતું કે ર૦ હજાર રૂપિયા તેમાંથી ઉપડી ગયા હતા અને બીજા ૧૮ હજાર રૂપિયા અન્ય વ્યકિતના ખાતામાં ટ્રાન્સફર થઇ ગયા હતા.

કિરીટરાજે તાત્કા‌િલક એસબીઆઇમાં જઇ તપાસ કરતાં તેમને જાણવા મળ્યું કે તેમની પાસે રહેલું એસબીઆઇનું ડેબિટકાર્ડ બ્લોક થઇ ગયું હતું. કિરીટરરાજે પૈસા ઉપાડવા માટે જે વ્યકિતની મદદ લીધી હતી તેણે ચપળતાપૂર્વક તેમનું કાર્ડ બદલી નાખ્યું હતું અને તેની જગ્યાએ અન્ય કોઇ વ્યકિતનું કાર્ડ પધરાવી દીધું હતું. ઘાટલોડિયા પોલીસે આ મામલે ગુનો દાખલ કરીને તપાસ શરૂ કરી છે.