ફેબ્રુઆરીમા જથ્થાબંધ બાદ છૂટક મોંઘવારી દર પણ વધીને 6.7 ટકાની સપાટીએ પહોંચ્યો છે.
સરકારે છૂટક મોંઘવારીના આંકડા જારી કર્યાં
છૂટક મોંઘવારી 8 મહિનાની ટોચે પહોંચી
ફેબ્રુઆરીમાં છૂટક મોંઘવારી દર વધીને 6.7 ટકા થયો
ફેબ્રુઆરી મહિનામાં મોંઘવારીનો ડબલ ઝટકો લાગ્યો છે. પહેલા જથ્થાબંધ અને હવે છૂટક મોંઘવારી દર ફેબ્રુઆરીમાં વધીને 6.7 ટકા થયો છે. ગયા મહિને પણ કન્ઝ્યુમર પ્રાઇસ ઇન્ડેક્સ પર આધારિત ફુગાવાનો દર રિઝર્વ બેન્ક ઓફ ઇન્ડિયા (આરબીઆઇ)ની અપર ટાર્ગેટ રેન્જ કરતાં ઊંચો હતો. આંકડા અને કાર્યક્રમ અમલીકરણ મંત્રાલયે સોમવારે રિટેલ ફુગાવા સાથે સંબંધિત ડેટા જાહેર કર્યા હતા.
Retail inflation rises marginally to 6.07 pc in Feb from 6.01 pc in Jan: govt data
તેલથી માંડીને ચપ્પલ સુધીની વસ્તુઓ થઈ મોંઘી
સરકારે જાહેર કરેલા આંકડા મુજબ ફેબ્રુઆરીમાં રિટેલ ફુગાવો આઠ મહિનાની ઊંચી સપાટીએ પહોંચ્યો હતો. કારણ કે ગયા મહિને વર્ષ દર વર્ષના આધાર પર તેલ અને ફેટના ભાવમાં 16 ટકાથી વધુનો વધારો થયો છે. ફૂટવેરના ભાવમાં 10.10 ટકા અને ઇંધણ અને લાઇટની કિંમતમાં 8.73 ટકાનો વધારો થયો છે.સરકાર તરફથી જાહેર કરવામાં આવેલા એક નિવેદન અનુસાર, ખનિજ તેલ, મૂળભૂત ધાતુઓ, રસાયણો અને રાસાયણિક ઉત્પાદનો, ક્રૂડ પેટ્રોલિયમ અને કુદરતી ગેસ, ખાવાપીવાની વસ્તુઓ અને બિન-ખાદ્ય ચીજોના ભાવમાં ગયા વર્ષના સમાન મહિનાની તુલનામાં તીવ્ર વધારો થયો છે.
જથ્થાબંધ મોંઘવારી પણ વધીને 13.11 ટકા થઈ
સરકારે સોમવારે ફેબ્રુઆરી મહિનાના જથ્થાબંધ ફુગાવાના આંકડા જાહેર કર્યા છે. સરકાર દ્વારા જાહેર કરવામાં આવેલા આંકડા મુજબ હોલસેલ કિંમતો પર આધારિત મોંઘવારી ગત મહિને વધીને 13.11 ટકા થઈ ગઈ છે. જથ્થાબંધ ભાવો પર આધારિત ફુગાવો સતત ૧૧મા મહિને વધ્યો હોવાથી આ બાબતે સામાન્ય લોકોને આંચકો આપ્યો છે.
ખાદ્ય ચીજવસ્તુઓનો ફુગાવો ઘટીને 8.19 ટકા થયો
દરમિયાન જાન્યુઆરીની સરખામણીએ ફેબ્રુઆરીમાં ખાદ્ય ચીજવસ્તુઓનો ફુગાવો ઘટીને 8.19 ટકા થયો હતો. જાન્યુઆરીમાં ખાદ્ય ચીજવસ્તુઓનો ફુગાવો 10.33 ટકા રહ્યો હતો. શાકભાજીનો જથ્થાબંધ ફુગાવો જાન્યુઆરીમાં ૩૮.૪૫ ટકાથી ઘટીને ફેબ્રુઆરીમાં ૨૬.૯૩ ટકા થયો છે.
કઈ ચીજવસ્તુના ભાવમાં કેટલો વધારો કે ઘટાડો
ફેબ્રુઆરીમાં ડુંગળીના જથ્થાબંધ ભાવમાં 26.37 ટકાનો ઘટાડો થયો છે. તે જ સમયે, બટાકાના ભાવમાં 14.78 ટકાનો ઉછાળો જોવા મળ્યો હતો. ઇંડા, માંસ અને માછલીના ભાવમાં 8.14 ટકાનો ઉછાળો જોવા મળ્યો હતો, જ્યારે ઘઉંના ભાવમાં 11.03 ટકાનો ઉછાળો જોવા મળ્યો હતો. રશિયા-યુક્રેન યુદ્ધમાં સમગ્ર વિશ્વમાં ઘઉંના ભાવમાં ઉછાળો જોવા મળ્યો છે.