દેશમાં કોરોના સંકટને કારણે ચાલી રહેલા લોક ડાઉનના પગલે ખાદ્ય પદાર્થો અને બળતણના ભાવમાં થયેલ ઘટાડાને પગલે દેશનો રિટેલ ફુગાવો ફેબ્રુઆરીના 6.58%થી ઘટીને 5.91%થઇ ગયો હતો. આ તારણ સોમવારે સરકારી ડેટામાં જોવા મળ્યું હતું.
નોંધનીય છે કે આ કન્ઝ્યુમર પ્રાઇસ ઇન્ડેક્સ (CPI) ઉપર આધારિત રિટેલ ફુગાવો માર્ચ 2019માં એટલે કે ગયા વર્ષે 2.86% હતો.
ફૂડ બાસ્કેટમાં માર્ચ 2020માં 8.76% ફુગાવો જોવા મળ્યો હતો કે ગયા મહિનાના 10.81% કરતા ઘટ્યો હતો. આ ડેટા NSO દ્વારા CPIના આંકડાઓમાં જાહેર કરાયો હતો. નોંધનીય છે કે RBI તેની દ્વિ માસિક પોલિસી બનાવતી વખતે રિટેલ ફુગાવાને ખાસ ધ્યાનમાં લે છે. સરકારે આ ફુગાવો 4%ની આસપાસ રહે તેની ખાસ તાકીદ કરી છે.
શાકભાજીમાં ફુગાવો
શાકભાજીમાં ફુગાવો 18.63% રહ્યો હતો જે ગયા મહિને 31.61% હતો આ ઉપરાંત અનાજ અને અન્ય ઉત્પાદનોમાં ફુગાવો 5.3% હતો જે એક મહિના અગાઉ 5.23% હતો જયારે કઠોળ અને અન્ય ઉત્પાદનોમાં ફુગાવો 15.85% રહ્યો હતો જે એક મહિના અગાઉ 16.61% હતો.
આ ઉપરાંત માંસ અને માછલીઓમાં ફુગાવો 9.15% રહ્યો હતો જે ગયા મહિને 10.2% હતો. આ સિવાય બળતણમાં ફુગાવો 6.59% રહ્યો હતો જે ગયા મહિને 6.36% હતો.નોંધનીય છે કે કોરોના વાયરસ મહામારીના પગલે RBIએ 27 માર્ચે રેપો રેટ 75 બેઝ પોઇન્ટ ઘટાડીને 4.40% રાખ્યો હતો.
RBIના ગવર્નર શક્તિકાન્ત દાસના મતે કોરોના સંકટને કારણે ઘટી ગયેલી સ્થાનિક અને વિદેશી માંગ જ્યાં સુધી સામાન્ય નહીં થાય ત્યાં સુધી આ પરિસ્થિતિ રહેશે તેમ જણાય છે. છેલ્લા 15 દિવસમાં જ વિશ્વના બજારોની તબિયત ચિંતાજનક રીતે લથડી છે અને વૈશ્વિક અર્થતંત્ર ફટકા ખાઈ રહ્યું છે.