આજે સ્થાનિક સ્વરાજની પેટાચૂંટણીના પરિણામ જાહેર થઈ રહ્યા છે. જિલ્લા અને તાલુકા પંચાયતની ચૂંટણીમાં ક્યાંક ભાજપ તો ક્યાંક કોંગ્રેસની જીત જોવા મળી રહી છે. મહિસાગરના વીરપુરની લીબરવાડા બેઠક પર ભાજપની જીત થઈ છે. ભાજપના ઉમેદવાર વાલમસિંહની 676 મતે જીત થઈ છે.
સ્થાનિક સ્વરાજની પેટાચૂંટણીના પરિણામ જાહેર
33માંથી 29 બેઠકોમાં ભગવો લહેરાયો
CM રૂપાણીએ ટ્વીટ કરી આભાર વ્યક્ત કર્યો
વિરમગામની તાલુકાપંચાયતની બેઠક પર ભાજપના ઉમેદવાર વિષ્ણુભાઈનો 1384 મતે વિજય થયો છે. પોરબંદર જિલ્લા પંચાયતની કંડોળા બેઠક પર ભાજપના ઉમેદવાર આશાબેન વિજેતા થયા છે. અરવલ્લીના મેઘરજ તાલુકા પંચાયતના બાઠીવાડા બેઠક પર શાંતાબેન સિસોદીયાની 2170 મતે જીત થઈ.
અમદાવાદની શિયાળ બેઠક પર કોંગ્રેસની જીત
નવસારીના ખેરગામ તાલુકા પંચાયતમાં ભાજપના ઉમેદવાર વિજય રાઠોડની 119 મતે જીત થઈ. ડાંગના સુબિર તાલુકા પંચાયતની કડમાળ બેઠક પર ભાજપના ઉમેદવાર છોટુભાઈ કગડેની જીત થઈ. અમદાવાદ જિલ્લા પંચાયતની શિયાળ બેઠક પર કોંગ્રેસના ઉમેદવાર બાબુભાઈ પઢારની 1500 મતથી જીત થઈ છે..
CM રૂપાણીએ આપ્યા અભિનંદન
રાજ્યની તાલુકા અને જિલ્લા પંચાયતની પેટાચૂંટણીના પરિણામ જાહેર થયા છે. પેટાચૂંટણીને લઈને મુખ્યમંત્રી વિજય રૂપાણીએ ટ્વીટ કરીને કાર્યકર્તાઓનો આભાર વ્યક્ત કર્યો છે. સીએમ રૂપાણીએ ટ્વીટ કરીને લખ્યુ છે કે, રાજ્યની તાલુકા પંચાયત અને જિલ્લા પંચાયતની પેટા ચૂંટણીમાં 29 બેઠક પર જીત થઈ છે. ઉમેદવારોને જીતાડવા બદલ જનતા અને તમામ કાર્યકર્તાઓનો આભાર. આ ચૂંટણીનો વિજય આગામી તાલુકા પંચાયત અને જિલ્લા પંચાયતની ચૂંટણીની એક ઝલક છે.