પેટાચૂંટણી / રેશ્મા પટેલે ભાજપ સાથે છેડો ફાડી આ પક્ષમાં કરી એન્ટ્રી, માણાવદર બેઠક પરથી લડશે પેટાચૂંટણી

ભાજપના પૂર્વ નેતા રેશમા પટેલ NCPમાં જોડાયા છે. વિધાનસભા ચૂંટણી પહેલા રેશમા પટેલે PAAS સાથે છેડો ફાડીને ભાજપમાં પ્રવેશ કર્યો હતો અને હવે લોકસભા ચૂંટણી પહેલા રેશમા પટેલે ભાજપનો સાથ છોડીને NCPમાં પ્રવેશ કર્યો છે. રેશમા પટેલ માણાવદર બેઠક પરથી પેટા ચૂંટણી લડશે. NCP પ્રદેશ પ્રમુખ જયંત બોસ્કીના હસ્તે ખેસ ધારણ કર્યો છે. આ સાથે જ રેશમા પટેલે પોરબંદર લોકસભા બેઠક પરથી પણ અપક્ષ ઉમેદવાર તરીકે ફોર્મ ભર્યું છે.

ગઈકાલે પોરબંદરમાં રેશ્મા પટેલે ભાજપ પર આકરા પ્રહારો કર્યા હતાં. તેમણે કહ્યું હતું કે ગ્રામ્ય વિસ્તારના લોકોની વેદના કોઈ સમજતું નથી. ત્યારે તેઓ લોકોની વચ્ચે રહી અને લોકોના પ્રશ્રોને વાચા આપશે. પોરબંદર લોકસભા બેઠક ઉપર કોંગ્રેસ અને ભાજપે પટેલ જ્ઞાતિના ઉમેદવારોની પસંદગી કરી છે. આગામી સમયમાં પોરબંદર લોકસભા બેઠક ઉપર રસાકસીનો જંગ જોવા મળશે તેવું ચોક્કસપણે કહી શકાય.