બેટ દ્વારકાના દરિયામાં ન્હાવા પડેલા બે યુવાનો ડૂબી જતાં રેસ્ક્યૂ ઓપરેશન હાથ ધરાયું હતું. આ દરમિયાન એક યુવકનો મૃતદેહ મળી આવ્યો છે. જ્યારે અન્ય એક યુવકની શોધખોળ હાથ ધરાઈ છે.
બેટ દ્વારકાના દરિયામાં બે યુવાન ડૂબ્યા
18 વર્ષીય યુવાનનો મૃતદેહ બહાર કાઢવામાં આવ્યો
અન્ય યુવાનની શોધખોળ ચાલુ
રાજ્યમાં ડુબવાની વધુ એક ઘટના સામે આવી છે. બેટ દ્વારકાના દરિયામાં ન્હાવા પડેલા બે યુવાનો ડૂબી જતા એક યુવાનનું મૃત્યુ નીપજ્યું છે. જ્યારે એક યુવકની શોધખોળ ચાલી રહી છે.
બેટ દ્વારકામાં કિરમાણી દરગાહ પાસે આવેલા દરિયામાં બે યુવાનો ન્હાવા પડ્યા હતા. જે દરમિયાન અચાનક જ બંને યુવાનો ડૂબી ગયા હતા. આ અંગેની સ્થાનિકો દ્વારા અધિકારીઓને જાણ કરાતા અધિકારીઓ ઘટનાસ્થળે દોડી આવ્યા હતા અને બંને યુવાનોની શોધખોળ હાથ ધરવામાં આવી હતી.
18 વર્ષીય યુવક મૃત હાલત મળી આવ્યો
આ દરમિયાન એક 18 વર્ષીય યુવક મૃત હાલત મળી આવતા તેનો મૃતદેહ બહાર કાઢવામાં આવ્યો છે. તેના મૃતદેહને પોસ્ટમોર્ટમ અર્થે દ્વારકાની હોસ્પિટલમાં ખસેડવામાં આવ્યો છે. જ્યારે અન્ય એક યુવકની શોધખોળ ચાલી રહી છે.
જામનગરમાં ઊંડા પાણીમાં ગરકાવ થતા યુવકનું મૃત્યુ
અત્રે ઉલ્લેખનીય છે કે, જામનગરના રોજીબંદર નજીક માછીમારી કરવા ગયેલા ત્રણ યુવકો પૈકી એક યુવકનો ઊંડા પાણીમાં ગરકાવ થઈ જવાના કારણે મૃત્યુ નીપજ્યું હતું. જ્યારે બે યુવકોનો બચાવ થયો હતો. જામનગરના પાણાખાણ વિસ્તારમાં રહેતો કેશુભાઈ સોલંકી નામનો યુવાન તેના મિત્રો સાથે મજૂરી કરવા માટે ગયો હતો. ત્રણેય યુવાનો મજૂરી કામ પૂરૂ કરીને રોજીબંદર નજીક આવેલી એક દરિયાઈ ખાડીની એક ચેનલમાં માછીમારી કરવા માટે રોકાયા હતા. આ દરમિયાન કેશુભાઈ સોલંકીને તરતાં ન આવડતું હોવાથી દરિયામાં પાણીમાં ગરકાવ થઈ જતાં ડૂબી જવાથી મૃત્યુ નીપજ્યું હતું.