પરેડ / પ્રજાસત્તાક દિનની પરેડમાં પશ્ચિમ બંગાળની 'કન્યાશ્રી' યોજનાની ઝાંખી કેન્દ્રને નામંજૂર

• કેન્દ્ર સરકાર અને પશ્ચિમ બંગાળની મમતા બેનરજી સરકાર વચ્ચે વધુ એક રાજકીય વિવાદ
• પ. બંગાળની ઝાંખી આ વખતના પ્રજાસત્તાક દિવસની પરેડમાં જોવા મળશે નહીં
• પશ્ચિમ બંગાળની ઝાંખીના પ્રસ્તાવને પસંદ કરનારી એક્સપર્ટ કમિટીએ ફગાવી

તેઓનું કહેવું છે કે, તેને રાજનૈતિક રંગ ન આપવો જોઇએ. પ્રજાસત્તાક દિવસની પરેડને નાની રાખવામાં આવે છે. જેમા જે સર્વશ્રેષ્ઠ ઝાંખી છે તેને જગ્યા આપવામાં આવે છે. કેન્દ્ર સરકારે ર૬ જાન્યુઆરીના રોજ યોજાનારી પ્રજાસત્તાક દિનની પરેડમાં પશ્ચિમ બંગાળની ઝાંખીનો સમાવેશ નહીં કરવાનો નિર્ણય કર્યો છે. આમ હવે આ મામલે કેન્દ્ર સરકાર અને પશ્ચિમ બંગાળની મમતા બેનરજી સરકાર વચ્ચે વધુ એક રાજકીય વિવાદ છેડાશે એ નિશ્ચિત છે.

સંરક્ષણ મંત્રાલયે જણાવ્યું હતું કે બંગાળ સરકારની ઝાંખીનો પ્રસ્તાવ નિષ્ણાત સમિતિ પાસે બે વખત ગયો હતો અને બીજી બેઠક સઘન ચર્ચા-વિચારણા બાદ આ પ્રસ્તાવ ફગાવી દેવાયો છે. પશ્ચિમ બંગાળ સરકાર છોકરીઓ માટે ચલાવવામાં આવતી યોજના 'કન્યાશ્રી' ને પ્રજાસત્તાક દિનની પરેડમાં સામેલ કરવા માગતી હતી. આ યોજનાની આંતરરાષ્ટ્રીય સ્તરે પણ સરાહના કરવામાં આવી ચૂકી છે.

આ અંગે પશ્ચિમ બંગાળના અધિકારીઓએ જણાવ્યું છે કે સંરક્ષણ મંત્રાલયની નિષ્ણાત સમિતિની બેઠકમાં અમારા રાજ્યની ઝાંખી અંગે ચર્ચા કરવા માટે અમને બોલાવવામાં આવ્યા નહોતા. અત્રે ઉલ્લેખનીય છે કે ર૦૧પથી લઇને અત્યાર સુધી પશ્ચિમ બંગાળ સરકાર બે વખત 'કન્યાશ્ર‌ી' યોજનાને પ્રજાસત્તાક દિનની પરેડમાં સામેલ કરવાની કોશિશ કરી ચૂકી છે, પરંતુ બંને વખત તેને મંજૂરી આપવામાં આવી નથી. 

ર૦૧૮માં પશ્ચિમ બંગાળ સરકારે 'એકતા હી ભાઇચારા' ના થીમ પર ઝાંખી રજૂ કરવાની કોશિશ કરી હતી, પરંતુ ર૦૧૮માં પણ તેના આ પ્રસ્તાવને ફગાવી દેવામાં આવ્યો હતો. મંત્રાલયના જણાવ્યા અનુસાર ર૦ર૦ની પ્રજાસત્તાક દિનની પરેડમાં કુલ પ૬ ઝાંખીના પ્રસ્તાવ આવ્યા હતા.