સ્ટડી / રિપોર્ટ : લૉકડાઉનમાં અંબાણીની ડબલ કમાણી, પરંતુ સામાન્ય માણસની વધી પરેશાની

• છેલ્લા 10 વર્ષમાં ત્રણ ગણી વધી મુકેશ અંબાણીની સંપત્તિ 
• જલ્દીથી જ 100 અબજ ડોલરના આંકડાને પર કરી શકે છે મુકેશ અંબાણી 
• ફેસબુક, ગૂગલ જેવી કંપનીઓએ તેમના સાહસમાં રોકાણ કર્યું છે 

હાલમાં મુકેશ અંબાણી ભારત સહિત સમગ્ર એશિયાના સૌથી વધુ ધનવાન વ્યક્તિ છે. છેલ્લા 10 વર્ષોમાં તેમની સંપત્તિ લગભગ 3 ગણી જેટલી વધી જવા પામી છે . જ્યાં 2010માં તેમની કુલ સંપત્તિ 27 અબજ ડોલર જેટલી હતી ત્યા આજે એક દશક બાદ 2020માં તે આંકડો 88 અબજ ડોલર સુધી પહોંચી જવા પામ્યો છે. 

જ્યારે કે CMIE ના રિપોર્ટ પ્રમાણે દેશમાં 50 લાખ જેટલા પગારદાર કર્મીઓની નોકરી છીનવાઇ ગઈ હતી. અને એક અન્ય અહેવાલના પ્રમાણે લગભગ 12 કરોડની સંખ્યામાં દેશમાં રોજગાર પ્રભાવિત થયાનો દાવો પણ કરાઇ રહ્યો હતો. 

મુકેશ અંબાણીને લોકડાઉનના સમયમાં જબરદસ્ત ફાયદો થયો છે 

રિલાયન્સ ના ચેરમેન મુકેશ અંબાણી ને લોકડાઉન ના સમયગાળામાં ઘણો ફાયદો થયો છે, તેઓ ભારતના એક માત્ર ઉદ્યોગપતિ છે જેમનો વેપાર લોકડાઉન ના સમયમાં પણ જબરદસ્ત રીતે વધવા પામ્યો છે. ફેસબુક, ગૂગલ જેવી કેટલીય મોટી કંપનીઓએ તેમના વેપારમાં રોકાણ કર્યું છે જો કે બીજી બાજુએ તેમણે પણ ઘણી કંપનીઓનું અધિગ્રહણ કર્યું છે, જેના પરિણામે આજે તેઓ લગાતાર 13 વર્ષોથી ભારતના સૌથી ધનવાન વ્યક્તિ છે. 

છેલ્લા દસ વર્ષોમાં તેમની સંપત્તિમાં અધધ રકમનો વધારો નોંધાયો છે, અને હજુ આ જ ગતિ જો ચાલુ રહી તો ખૂબ જ ટૂંકા ગાળામાં તેમની કુલ સંપત્તિનો આંકડો વધીને 100 અબજ ડોલરથી વધુ થઈ શકે છે જે હાલમાં 88.7 અબજ ડોલરનો છે. 2018માં ભારતમાં સામાન્ય  પગાર ધોરણ 1,62,744 રૂપિયા જેટલું હતું જો કે મુકેશ અંબાણીની વાર્ષિક આવક તેનાથી 72 લાખ ગણી વધુ હતી. 

અજીમ પ્રેમજી યુનિવર્સિટીની એક સ્ટડી રિપોર્ટમાં સામે આવી છે માહિતી 

આ માહિતીનો આધાર અજીમ પ્રેમજી યુનિવર્સિટીમાં કરવામાં આવેલ એક રિપોર્ટ છે. 2019માં મુકેશ અંબાણીને 45 લાખ ડોલરના હિસાબે રોજની આવક થઈ હતી. આ વર્ષે તેમની સંપત્તિ 16.4 અબજ ડોલર જેટલી વધી હતી. 

કોર્પોરેટ ટેક્સ ઘટાડાનો નિર્ણય ઉદ્યોગપતિઓને ફળ્યો 

જો કે કોરોના સમયગાળામાં અને લોકડાઉનમાં દેશમાં આર્થિક ગતિવિધિઓ બંધ જેવી થઈ ગઈ હતી, છતાં પણ ધનવાનોની સંપત્તિ વધવાનું કારણ ફોર્બ્સ મેગેજીને મોદી સરકારના કોર્પોરેટ ટેક્સ ઘટાડવાના નિર્ણયને પણ માન્યું હતું. ગત વર્ષે આ ટેક્સના દરને 35 ટકાથી ઘટાડીને 25 ટકા સુધી સીમિત કરી નાખ્યું હતું, જેના લીધે ભારતના ઉદ્યોગપતિઓને બચત થઈ હતી અને તે રકમ તેમણે ધંધામાં ઇન્વેસ્ટ કરી હતી. 

2019 માં મુકેશ અંબાણીની સંપત્તિ 51.4 અબજ ડોલર હતી જયારે કે હાલમાં તેમની નેટવર્થ 88.7 અબજ ડોલર છે. થોડા સમય પહેલા જ બ્લૂમબર્ગ એ તેમની સંપત્તિ 80.6 અબજ ડોલરની બતાવી હતી જેમાં તેમણે દુનિયાના ચોથા સૌથી ધનવાન વ્યક્તિ બતાવ્યા હતા.