- રાજ્યભરમાં ઉત્તરાયણના તહેવાર પર મેડિકલ ઈમરજન્સીના બનાવો વધ્યા
- 108ને બપોરે 12 વાગ્યા સુધી ઈમરજન્સીના અઢળક કોલ મળ્યા
- દોરી વાગવાની અલગ અલગ 29 બનાવો સામે આવ્યા
- વડોદરામાં યુવકનું દોરીથી ગળું કપાઈ જતાં મોત
રાજ્યભરમાં ઉત્તરાયણના તહેવાર પર મેડિકલ ઈમરજન્સીના બનાવો પણ વધ્યા છે. વિગતો મુજબ આજે 108ને બપોરે 12 વાગ્યા સુધી ઈમરજન્સીના અઢળક કોલ મળ્યા હતા. જેમાં દોરી વાગવાના અલગ અલગ 29 બનાવો સામે આવ્યા છે. જોકે આ બનાવોમાં અમદાવાદમાં દોરી વાગવાના સૌથી વધુ 14 ઘટના સામે આવી છે. આ સાથે રોડ અકસ્માતના 170 બનાવોમાંથી અમદાવાદમાં સૌથી વધુ 26 બનાવ બન્યા છે.
ગુજરાતમાં ઉત્તરાયણ ( મકરસંક્રાતિ ) ના તહેવારને લઈ ચારે તરફ પતંગરસિયાઓ સવારથી જ પતંગ ચગાવવા સહપરિવાર સાથે ધાબે ચડી ગયા છે. એમાંય વળી હવામાન વિભાગે 15થી 20 કિ.મી પ્રતિ કલાકની પવનની ગતિની આગાહી કરી છે. ત્યારે પતંગ રસિકોમાં અનેરો ઉત્સાહ જોવા મળી રહ્યો છે. તો બીજી બાજુ ઉત્તરાયણની ઉત્સાહભેર ઉજવણી સાથે ઉંધિયા માર્કેટમાં પણ લોકોનો વહેલી સવારથી ધસારો જોવા મળ્યો છે.
ઉત્તરાયણના દિવસે ધાબા પરથી પડવાના બનાવો વધ્યા
ગુજરાતમાં ઉત્તરાયણના દિવસે ઊંચાઈએથી પડી જવાની ઘટનાઓમાં પણ વધારો થયો છે. ધાબા પરથી પડી જવાને કારણે સર્જાયેલી ઈમરજન્સીના 73 બનાવો બનાયા છે. વિગતો મુજબ અમદાવાદમાં 16, સુરતમાં પડી જવાના 11 બનાવો સામે આવ્યા છે. આ સાથે શારીરિક ગંભીર ઈજાઓની રાજ્યભરમાં 33 ઘટનાઓ બની છે.
.JPG)
મહીસાગરમાં પતંગની દોરીના કારણે અકસ્માત
મહીસાગરમાં પતંગની દોરીના કારણે અકસ્માતની ઘટના સામે આવી છે. વિગતો મુજબ બાલાસીનોર-અમદાવાદ હાઇવે પતંગની દોરીથી અકસ્માત સર્જાયો હતો. જેમાં દોરી ગળામાં ફસાઈ જતા 2 બાઇક સવાર ઈજાગ્રસ્ત થયા હતા. જેને લઈ બંને ગંભીર ઈજાગ્રસ્તોની તાત્કાલિક સારવાર શરૂ કરવામાં આવી હતી. વિગતો મુજબ અમદાવાદથી દાહોદ જઈ રહેલા પરિવારને અકસ્માત નડ્યો છે.
.JPG)
રાજકોટમાં ચાઇનીઝ દોરીથી 2 વ્યક્તિને ઇજા તો વડોદરામાં યુવકનું ગળું કપાયું
આજે ઉત્તરાયણના દિવસે રાજકોટમાં ચાઇનીઝ દોરીથી 2 વ્યક્તિને ઇજા પહોંચી છે. જેમાં બંને વ્યક્તિઓને ગળાના ભાગે ગંભીર ઇજાઓ પહોંચતા રાજકોટની ખાનગી હોસ્પિટલમાં સારવાર અર્થે ખસેડાયા હતા. આ તરફ વડોદરામાં પતંગની દોરીથી યુવકનું ગળું કપાયું છે. વિગતો મુજબ દોરી ગળાના ભાગે વાગતા યુવકનું મૃત્યુ થયું છે. આ યુવક દશરથ બ્રિજ પરથી પસાર થઈ રહ્યો હતો. જોકે ઘટનાને પગલે સ્થાનિક તંત્રની ટીમ દોડતી થઈ છે.
મોરવા હડફ અને દેવગઢબારિયામાં 2 યુવક દોરીથી ઇજાગ્રસ્ત
ઉત્તરાયણના દિવસે પતંગનો દોરી આવી જતાં વધુ બે બાઈક ચાલકો ઇજાગ્રસ્ત થયા છે. બાઇક ચાલકો પોતાના જીવ બચાવવા જતાં માર્ગ ઉપર પટકાયા હતા. જેમાં એક યુવક મોરવા હડફ તાલુકાના મોજરી ગામેથી પસાર થઈ રહ્યો હતો ત્યારે અચાનક ગળામાં પતંગની દોરી આવી જતા જ તેને સ્વ બચાવ માટે દોરો પકડવા જતા સ્ટીયરીંગ નો કાબુ ગુમાવ્યો હતો અને માર્ગ ઉપર પટકાતા પગ અને શરીરના ભાગે ગંભીર ઇજાઓ પછી હતી. આ ઉપરાંત દેવગઢબારિયા ના મોટીઝરી પાસે બાઈક લઈને માર્ગ ઉપરથી પસાર થતા યુવકના ગળામાં અચાનક પતંગની દોરી આવી જતા તે પણ માર્ગ પર પટકાયો હતો. જેથી ઇજાઓ પહોંચતા ગોધરા સિવિલ હોસ્પિટલમાં સારવાર માટે લાવવામાં આવ્યો છે.
