સાફ અને ચોખ્ખા કપડાં તમારી પર્સનાલીટીમાં ચાર ચાંદ લગાવે છે. તો ડાઘા વાળા કપડાં તમારી પર્સનાલિટી પર ખરાબ અસર પાડે છે. જો કપડાં પર ડાઘ લાગી જાય તો તે ઘણા મોંઘા હોય કે પછી તેને આપણે એક જ વાર પહેર્યા હોય છતાં પણ આપણે તે ફરીથી પહેરવાનું પસંદ કરતા નથી. જો તમારા કપડાં પર કોઈ ડાઘ લાગ્યા હોય તો તેનાથી પરેશાન થવાની જરૂર નથી. કારણ કે આજે અમે એવા કેટલાક ઘરેલૂ અને સસ્તા ઉપાયો બતાવવા જઇ રહ્યા છીએ જેની મદદથી કપડાં પર લાગેલા રંગનો ડાઘ પણ સરળતાથી દૂર કરી શકો છો. તેના માટે તમારે કોઈ ખાસ પ્રકારનો ખર્ચ કરવાની જરૂર નથી. જાણો ઘરની કઈ એવી વસ્તુઓ છે જેની મદદથી તમે કયા પ્રકારના કપડાંના ડાઘને દૂર કરી શકો છો.
કપડાં પરના ડાઘ દૂર કરશે આ ઘરેલૂ ઉપાય
ઈન્ક કે કેટઅપના ડાઘ દૂર કરવા કરો આ ઉપાય
એકસ્ટ્રા ખર્ચ વિના કરો કપડાંના ડાઘ દૂર
ઈન્ક લાગી હોય તો કરો મીઠાનો પ્રયોગ
કપડાં પર ઇન્ક લાગી ગઈ છે તો બિલકુલ ગભરાવું નહિ. કારણ કે મીઠાના ઉપયોગથી તમે તે ડાઘને સરળતાથી હટાવી શકો છો. મીઠાનો પ્રયોગ ઇન્ક લાગતાંની સાથે જ કરવો જરૂરી બની જાય છે. ઇન્ક સુકાઈ જાય ત્યાર બાદ આ પ્રયોગની કોઈ અસર થતી નથી. તેના માટે જ્યાં ઇન્ક લાગેલી છે ત્યાં મીઠું નાંખો અને પછી તે જગ્યાને ટીસ્યુ પેપરથી ઘસીને સાફ કરી લો. હવે કપડાંને ત્યાં સુધી ઘસવું જ્યાં સુધી કપડાં પર લાગેલો ડાઘ દૂર ના થઇ જાય.
કેચઅપના ડાઘ દૂર કરવા કરો આ પ્રયોગ
કપડા પર કેચઅપનો ડાઘ પડ્યો હોય તો પણ ગભરાવાની જરુર નથી. પાણીમાં અડધી ચમચી લિકવિડ ડિશ વોશ ડિજરજન્ટ અને 1 ચમચી વિનેગર નાખો. આ પાણીમાં ડાઘ પડેલું કપડું બોળો અને 30 મિનિટ સુધી રહેવા દો. પછી તેને પાણીમાંથી બહાર કાઢીને હુંફાળા પાણીમાં ધોઈ નાખો. કપડાને વધારે ચોખ્ખું કરવા માટે તેને ધોવામાં નાખો તે પહેલા સ્ટેઈન રિમૂવરનો ઉપયોગ પણ કરી શકો છો.
ચોકલેટનો ડાઘ હટાવવા કરો કપડાં ધોવાના પાવડરનો ઉપયોગ
જો કપડાં પર ચોકલેટનો ડાઘ પડી જાય તો એકદમ ઠંડું પાણી લઈને જેટલો ડાઘ (કાપડની બન્ને તરફથી) સાફ થાય તેટલો કરી લો. ધ્યાન રાખો ચોકલેટનો ડાઘ વધારે કપડાની અંદર ન જાય. હવે કપડાના એ ડાઘવાળા ભાગને એક કપમાં કપડા ધોવાનો પાઉડર લઈને બોળી રાખો. હવે તેને વ્યવસ્થિત રીતે ધોઈ લો.
ઈન્કના ડાઘ દૂર કરશે નેલ રિમૂવર
નેલ પોલિશ રીમૂવરથી પણ કપડાં પર લાગેલો રંગ દૂર કરી શકાય છે. આ ઉપાય પેનની સાહીના ડાઘને દૂર કરવા માટે વધારે અસરકારક સાબિત થાય છે. તેના માટે રૂમાં થોડું નેલપોલિશ રીમૂવર નાખો અને ડાઘ હોય તે જગ્યાએ ઘસો. હવે તે કપડાંને સર્ફ અને પાણીની મદદથી સાફ કરી લો. પછી ડાઘ જતો રહેશે.
કલરનો ડાઘ દૂર કરશે ટૂથપેસ્ટ
ટૂથપેસ્ટથી તમે કપડાં પર લાગેલા ડાઘને દૂર કરી શકો છો. જો તમારા કપડાં પર કોઈ રંગનો ડાઘ બેસી ગયો છે તો તમે ટૂથપેસ્ટનો ઉપયોગ કરી શકો છો. તેમજ આ ઉપાય દરેક પ્રકારના દાગ તથા રંગને દૂર કરવા માટેનો સરળ ઉપાય છે. તેના માટે કોઈ પણ જેલ વગરનું ટૂથપેસ્ટ લો અને તેને કપડાં પર તે જગ્યાએ લગાવો જ્યાં રંગનો ડાઘ લાગેલો છે. ત્યાર બાદ તેને સૂકાવા દો અને સૂકાયા પછી તેને ડીટરજન્ટ વડે કપડાંને સાફ કરી લો અને પછી જોવો ડાઘ દૂર થઇ ગયો હશે.