વિવાદ / ભારતમાં વાઈરલ થયેલી 'રીમૂવ ચાઈના એપ' એપ્લિકેશન ગૂગલ પ્લે સ્ટોરે હટાવી દીધી; વપરાશકર્તાઓમાં આક્રોશ

‘રિમૂવ ચાઇના એપ’ ગયા મહિનાની ૧૭ તારીખે લોન્ચ કરવામાં આવી હતી. ત્યારબાદ ભારતીયોમાં આ એપનો ઉપયોગ ચીન પ્રત્યે ગુસ્સો વ્યક્ત કરવા માટે થવા લાગ્યો હતો. આ એપ દેશમાં અનેક કારણોથી લોકપ્રિય થઈ રહી છે. ભારત-ચીન સરહદ પર સતત વધતા જતા તણાવ અને કોરોના મહામારીના કારણે થઈ રહેલા મોટા નુકસાનને સૌથી મહત્ત્વનું કારણ માનવામાં આવે છે. એવો દાવો કરવામાં આવી રહ્યો છે કે, તેનાથી ટિકટોક અને યૂસી બ્રાઉઝર જેવી કથિત ચાઇનીઝ એપ ડિલિટ કરી શકાય છે. જોકે એપને બનાવનારી ‘વન ટચ એપ લેબ્સ’એ તેને શૈક્ષણિક ઉદ્દેશ્યો માટે બનાવવાની વાત કહી હતી.

તેમ છતાં પણ ગૂગલે ‘રિમૂવ ચાઇના એપ’ને પોતાના પ્લે સ્ટોર પરથી હટાવવા વિશે કોઈ સત્તાવાર જાણકારી આપી નથી. કંપનીએ એ વાતનો ખુલાસો પણ કર્યો નથી કે, આ એપને પ્લે સ્ટોર પરથી ડાઉનલોડ કરવાનો વિકલ્પ આખરે શા માટે બંધ કરવામાં આવ્યો છે અને ન તો એ વાતનો ખુલાસો કર્યો છે કે ફરીથી આ એપ પ્લે સ્ટોર પર ક્યારે ઉપલબ્ધ થશે. જયપુરની કંપની ‘વન ટચ અને એપ લેબ્સ’એ પોતાના સત્તાવાર ટ્વિટમાં એ વાતનો સ્વીકાર કર્યો છે કે, તેમની એપને ગૂગલે પ્લે સ્ટોર પરથી સસ્પેન્ડ કરી દીધી છે.

ગુગલ મોટા ભાગે એવી એપ્સ રીમૂવ કરે છે જે એપ્સ પ્લે સ્ટોર્સની પોલિસીનો ભંગ કરતી હોય. એક અહેવાલ પ્રમાણે આ એપ પ્લે સ્ટોરની spam and minimum functionality’ policyનો ભંગ કરી રહી હતી. નોંધનીય છે કે જો તમે રિમૂવ ચાઇના એપ પહેલેથી તમારા ફોનમાં ડાઉનલોડ કરેલી છે તો તે ચાલુ જ રહેશે.