બિઝનેસ / વિશ્વની આ મોટી કંપનીને પછાડીને રિલાયન્સ વિશ્વની એનર્જી સેક્ટરની બીજી સૌથી મોટી કંપની

રિલાયન્સ દેશનું સૌથી મોટું રિફાઇનરી સંગઠન મેનેજ કરે છે. તેના કેપિટલમાં 4.3%નો વધારો થયો હતો જેથી તેની માર્કેટ વેલ્યુમાં 8 અબજ ડોલરનો વધારો થયો હતો અને તેની માર્કેટ વેલ્યુ 189 અબજ ડોલર છે. આ તરફ ExxonMobil Corp.ની માર્કેટ વેલ્યુમાં 1 અબજ ડોલરનો ઘટાડો થયો છે. રિલાયન્સના શેર આ વર્ષે 43% ઉછળ્યા હતા જયારે ExxonMobil Corp.ના શેર 39% ઘટ્યા હતા કારણ કે ફ્યુઅલની ડિમાન્ડમાં વૈશ્વિક ઘટાડો થયો છે. અરામકો માર્કેટ કેપિટલમાં 1.76 ટ્રિલિયન ડોલર સાથે વિશ્વની સૌથી મોટી એનર્જી કંપની છે.

ગયા નાણાકીય વર્ષમાં રિલાયન્સના કુલ રેવન્યુમાં 80% હિસ્સો એનર્જી બિઝનેસનો હતો. તાજેતરમાં રિલાયન્સના ચેરમેન મુકેશ અંબાણીએ ડિજિટલ અને રિટેલ સેક્ટરમાં રોકાણ વધારીને Jioમાં 20 અબજ ડોલરનું રોકાણ મેળવ્યું હતું. આમ કરવાથી તેમની અંગત સંપત્તિમાં પણ ખૂબ વધારો થયો હતો અને તેઓ વિશ્વના 5માં સૌથી ધનિક વ્યક્તિ બની ગયા હતા. 

અંબાણીએ ગૂગલથી લઇને ફેસબુક સુધીની કંપનીઓ તરફથી રોકાણ મેળવ્યું છે. બીજી તરફ ઓઇલ કંપનીઓ અત્યાર સુધીની સૌથી ઓછી માંગ સાથે સંઘર્ષ કરી રહ્યા છે. તેમની નિયમિત માંગ ઘટીને ત્રીજા ભાગની થઇ ગઈ છે જયારે લાખો બેરલ ઓઇલ વેચાયા વગર પડ્યું હોવાથી એક્ઝોન મોબિલ અને શેવરોન કોર્પ જેવી કંપનીઓને મોટો ફટકો પડ્યો છે.