બિઝનેસ / તમામ સરકારી કંપનીઓની મૂડી ભેગી કરો તો પણ અંબાણીના સામ્રાજ્ય સામે ટૂંકુ પડે ; રિલાયન્સનો નવો રેકોર્ડ

મુકેશ અંબાણીની રિલાયન્સ ઇન્ડસ્ટ્રીઝ દરરોજ નવી સિદ્ધિઓ પ્રાપ્ત કરી રહ્યું છે. મુકેશ અંબાણીની રિલાયન્સ ઇન્ડસ્ટ્રીઝ લિમિટેડનું માર્કેટ વેલ્યુએશન દેશની તમામ સરકારી કંપનીઓની કુલ મૂડી કરતા વધારે છે. જાન્યુઆરી 2020થી દેશની સૌથી વેલ્યુએબલ કંપની રિલાયન્સ ઇન્ડસ્ટ્રીઝ લિમિટેડના શેરમાં 54.6 ટકાનો વધારો થયો છે. ગૂગલ, ફેસબુક અને સિલ્વરલેક જેવી મોટી કંપનીઓનું Jio પ્લેટફોર્મ અને રિલાયન્સ રિટેલના શેરમાં ઇન્વેસ્ટમેન્ટ આ વધારાનું મુખ્ય કારણ માનવામાં આવી રહ્યું છે.

83 PSUનું માર્કેટ કેપ 15.16 લાખ કરોડ

દેશના 83 પબ્લિક સેક્ટર અંડરટેકિંગ (PSU)નું ટોટલ માર્કેટ કેપિટલાઈઝેશન 15.16 લાખ કરોડ રૂપિયા છે. તે જ સમયે, મુકેશ અંબાણીની રિલાયન્સ ઇન્ડસ્ટ્રીઝ લિમિટેડનું માર્કેટ કેપિટલાઈઝેશન 15.30 લાખ કરોડ રૂપિયા છે.

આ વર્ષની શરૂઆતમાં દેશમાં તમામ પબ્લિક સેક્ટર અન્ડરટેકિંગનું માર્કેટ કેપિટલાઇઝેશન રિલાયન્સ ઇન્ડસ્ટ્રીઝ લિમિટેડ કરતા બમણું હતું. વર્ષના પ્રારંભમાં દેશની તમામ પબ્લિક સેક્ટર કંપનીઓનું માર્કેટ કેપિટલાઈઝેશન 19.3 લાખ રૂપિયા હતું જયારે રિલાયન્સનું માર્કેટ કેપિટલાઈઝેશન 9.6 લાખ રૂપિયા હતું.

6 મહિનામાં રિલાયન્સે ઇક્વિટી કેપિટલથી 33 અબજ ડોલર ઉભા કર્યા

છેલ્લા 6 મહિનામાં રિલાયન્સ ઇન્ડસ્ટ્રીઝ લિમિટેડ ઇક્વિટી કેપિટલથી 33 અબજ ડોલર ઉભા કર્યા છે. આ ઉપરાંત છેલ્લા છ મહિનામાં રિલાયન્સ ઇન્ડસ્ટ્રીઝ લિમિટેડે તેના રોકાણકારોની રકમ બમણાથી વધુ કરી દીધી છે. 

બ્લૂમબર્ગના ડેટા અનુસાર, મંગળવાર સુધીમાં, રિલાયન્સ ઇન્ડસ્ટ્રીઝ લિમિટેડનું માર્કેટ કેપિટલાઇઝેશન 207.88 અબજ ડોલર છે, જે ભારતમાં સ્ટોક એક્સચેંજમાં લિસ્ટેડ કંપનીઓમાં 10% છે. આશરે 2.11 ટ્રિલિયન ડોલરનું માર્કેટ વેલ્યુએશન સાથે ભારત વિશ્વનું 10મું સૌથી મોટું ઇક્વિટી માર્કેટ છે.

SBIનું માર્કેટ કેપ 1.79 લાખ કરોડ

દેશની સૌથી મોટી સરકારી કંપની સ્ટેટ બેંક ઓફ ઇન્ડિયાનું માર્કેટ કેપિટલાઈઝેશન 1.79 લાખ કરોડ રૂપિયા છે. જે રિલાયન્સ ઇન્ડસ્ટ્રીઝના માર્કેટ કેપિટલાઇઝેશનની સરખામણીએ ખૂબ ઓછી છે. ટાટા જૂથની આઇટી કંપની TCS માર્કેટ કેપિટલાઇઝેશનના મામલામાં બીજા નંબર પર છે. તેનું માર્કેટ કેપિટલાઇઝેશન 9.35 લાખ કરોડ રૂપિયા છે.

રિલાયન્સ ઇન્ડસ્ટ્રીઝ લિમિટેડના શેરના ભાવમાં સતત વધારાને કારણે મુકેશ અંબાણી વિશ્વના છઠ્ઠા ધનિક વ્યક્તિ બન્યા છે. મુકેશ અંબાણી પાસે 88.4 અબજ ડોલરની સંપત્તિ છે. જૂન 2020ના અંત સુધીમાં પ્રમોટર ગ્રુપ પાસે કંપનીનો 50.37% હિસ્સો છે.