બિઝનેસ / ફેસબુક પાસેથી રિલાયન્સ જિઓ પ્લેટફોર્મને મળ્યા આટલા કરોડ રૂપિયા, 9.99 ટકા ભાગીદારીનો હતો કરાર

• ફેસબુક અને રિલાયન્સ જિઓ વચ્ચે થયો હતો કરાર
• ફેસબુકે પહેલીવાર મોટી કંપનીમાં ભારતમાં રોકાણ કર્યું
• જિઓ પ્લેટફોર્મ્સને ફેસબુક તરફથી મળ્યા 43574 કરોડ રૂપિયા

જિઓ પ્લેટફોર્મ્સ અને ફેસબુક વચ્ચેનો કરાર 22 એપ્રિલના રોજ થયો હતો. ફેસબુક દ્વારા આ રોકાણ સાથે જિઓમાં 9.99% હિસ્સો લેવામાં આવ્યો છે.રિલાયન્સ જિઓ પ્લેટફોર્મ્સને કંપનીના 9.99 ટકા હિસ્સેદારી માટે ફેસબુક તરફથી 43,574 કરોડ રૂપિયા મળ્યા છે. જિઓ પ્લેટફોર્મ અને ફેસબુક વચ્ચેના સોદાની જાહેરાત 22 એપ્રિલના રોજ કરવામાં આવી હતી.

રિલાયન્સ ઇન્ડસ્ટ્રીઝે મંગળવારે શેર માર્કેટમાં આ માહિતી આપી છે. રિલાયન્સ ઇન્ડસ્ટ્રીઝે કહ્યું, 'તમામ જરૂરી મંજૂરીઓ મળ્યા પછી, કંપનીની પેટાકંપની જિઓ પ્લેટફોર્મ લિમિટેડને ફેસબુકની સંપૂર્ણ માલિકીની પેટાકંપની જાધૂ હોલ્ડિંગ્સ, એલએલસી (Jaadhu Holdings)  તરફથી 43,574 કરોડ રૂપિયા મળ્યા છે.' ફેસબુકે જિઓ પ્લેટફોર્મ્સમાં 4.62 લાખ કરોડના એન્ટરપ્રાઇઝ મૂલ્યમાં 9.99 ટકા ભાગીદારી લીધી છે.

બંનેને માટે છે ફાયદારૂપ કરાર

આ ડીલ દ્વારા જ્યાં ફેસબુકે ભારતમાં પહેલીવાર કોઈ મોટી કંપનીમાં રોકાણ કર્યું છે. ત્યાં ફેસબુક અને વોટ્સએપની મદદથી દેશના આશરે 6 કરોડ નાના દુકાનદારો સુધી પહોંચી શકાય છે. આનાથી ભારતમાં ફેસબુકના પ્રવેશમાં વધારો થશે. છેલ્લા પાંચ વર્ષમાં ભારતમાં 56 કરોડ લોકો સુધી ઇન્ટરનેટ પહોંચ્યું છે અને જિઓના નેટવર્કમાં 38.8 કરોડ ગ્રાહકો છે. નોંધપાત્ર વાત એ છે કે માર્ક ઝુકરબર્ગની આગેવાની હેઠળના ફેસબુકે આ રોકાણની જાહેરાતના એક મહિના પહેલા જાધુ હોલ્ડિંગની રચના કરી હતી. તેનું મુખ્ય મથક ડેલાવેયરમાં છે, જેને કર મુક્તિ સ્થળ માનવામાં આવે છે.

લગભગ 1.18 લાખ કરોડનું રોકાણ

ગયા 11 અઠવાડિયામાં જિઓમાં લગભગ 1 ડઝન સોદામાં 1,17,588 કરોડ રૂપિયાનું રોકાણની જાહેરાત કરાઈ છે. મળતી માહિતી અનુસાર રોકાણ 25.09 ટકા પહોંચ્યું છે. સૌથી નવું રોકાણ ઈન્ટેલ કેપિટલનું રહ્યું છે. તેણે ગયા અઠવાડિયે જિઓ પ્લેટફોર્મ્સમાં 0.39 ટકા ભાગીદારીના બદલે 1,894.5 કરોડ રૂપિયાના રોકાણની જાહેરાત કરી હતી. ઈન્ટેલ કેપિટલ કંપનીમાં વૈશ્વિક સ્તરે રોકાણ કરવાની સાથે ક્લાઉડ કમ્પ્યુટિંગ, આર્ટિફિશિયલ ઈન્ટેલિજન્સ અને 5જી જેવા પ્રૌદ્યોગિક વિસ્તારમાં કામ કરે છે. આ એ ક્ષેત્ર છે જ્યાં રિલાયન્સ જિઓ પણ વિસ્તાર પામી રહી છે. 

આ કંપનીઓએ કર્યું છે રોકાણ

ગયા 3 મહિનામાં જે કંપનીઓએ જિઓ પ્લેટફોર્મમાં રોકાણ કર્યું છે તેમાં ફેસબુક, સિલ્વર લેક, વિસ્ટા ઇક્વીટી પાર્ટનર્સ, જનરલ એટલાન્ટિક, કેકેઆર, મુબાડલા, એડીઆઈએ, ટીપીજી, એલ રૈટેરટન અને પીઆઈએફ, ઈન્ટેલ સામેલ છે. 

દેવામુક્ત થઈ રિલાયન્સ ઈન્ડસ્ટ્રી

તાજેતરમાં રિલાયન્સ ઇન્ડસ્ટ્રીઝે દેવામુક્ત થવાની જાહેરાત કરી છે. કંપનીએ આ લક્ષ્યાંક સમયમર્યાદાના લગભગ 9 મહિના પહેલા જ હાંસલ કર્યો છે. ત્યાં આગળ રિલાયન્સ ઇન્ડસ્ટ્રીની માર્કેટ કેપિટલ પણ 11 લાખ કરોડને પાર કરી ગઈ છે.