બિઝનેસ / મુકેશભાઈ જ અનિલની કંપની ખરીદી લેશે કે શું? જિયોએ RComની એસેટ્સ ખરીદવા બીડ ભર્યું

• રિલાયન્સ કોમ્યુનિકેશનની એસેટ્સ માટે રૂ.25000 કરોડની બીડ મળી
• જિઓને રિલાયન્સ ઇન્ફ્રાટેલના ટાવર અને ફાઇબર એસેટ્સ મળવાનું હવે નક્કી
• યુવી એસેટ રિકન્સ્ટ્રકશનની કુલ રૂ16000 કરોડની બીડ 

રિલાયન્સ કોમ્યુનિકેશનની એસેટ્સ માટે રિલાયન્સ જિઓ અને યુવી એસેટ રિકન્સ્ટ્રકશન કંપની (યુવીએઆરસી) જેવા બાયર્સ તરફથી રૂ.25000 કરોડની બીડ મળી છે. રિલાયન્સ જિઓ અને યુવી એસેટ રિકન્સ્ટ્રકશન ઇનસોલ્વન્સી રિઝોલ્યુશન પ્રોસેસમાં સૌથી ઊંચા બીડર્સ તરીકે પસંદગી પામેલ છે. તેનાથી લેન્ડર્સને લગભગ રૂ.25000 કરોડ મળી શકે છે.

આ રકમ તેના રૂ49000 કરોડના કલેમથી 60 ટકા જેટલી ઓછી છે. બેન્કિંગ સૂત્રોના જણાવ્યા અનુસાર રિલાયન્સ જિઓને રિલાયન્સ ઇન્ફ્રાટેલના ટાવર અને ફાઇબર એસેટ્સ મળવાનું હવે નક્કી છે. જ્યારે યુવી એસેટ રિકન્સ્ટ્રકશનને આરકોમ અને તેની સબસિડિયરી રિલાયન્સ ટેલિકોમનું સ્પેકટ્રમ મળનાર છે.

સૂત્રોના જણાવ્યા અનુસાર ક્રેડિટર્સની કમિટીની બેઠક બાદ આ નિર્ણય લેવામાં આવ્યો હતો. આ અંગે બીડર્સને જાણકારી આપવામાં આવી હતી. વેચાણ માટે દેશના રર ટેલિકોમ સર્કલમાંથી 14માં 850 એમએચઝેડ બેન્ડમાં સ્પેકટ્રમ અને લગભગ 43000 ટેલિકોમ ટાવર, કેટલાક ફાઇબર અને ડેટા સેન્ટરનો સમાવેશ થાય છે. રિલાયન્સ જિઓએ રૂ.4700 કરોડની ઓફર કરી છે. જ્યારે યુવી એસેટ રિકન્સ્ટ્રકશનની કુલ રૂ16000 કરોડની બીડ છે.