બિઝનેસ / Jiomart બાદ હવે આ ધંધામાં પણ ઝંપલાવી શકે છે અંબાણી, બે કંપનીઓ પર નજર

• હાલમાં જ રિલાયન્સે ઓનલાઈન ગ્રોસરી સ્ટોર JioMart લોન્ચ કર્યું  
• ઓનલાઈન ફર્નિચર રિટેલર Urban Ladder ખરીદવા માટે વાતચીતના અહેવાલ 
• મિલ્ક ડિલીવરી ફર્મ  Milkbasket સાથે પણ વાતચીતમાં રિલાયન્સ 

વધુ એક ધમાકો કરશે અંબાણી ? 

ભારતની રિલાયન્સ ઇન્ડસ્ટ્રી પોતાના ઈ-કોમર્સ બિઝનેસને વધારવા માટે ઓનલાઈન ફર્નિચર રિટેલર Urban Ladder અને મિલ્ક ડિલીવરી ફર્મ  Milkbasketને ખરીદવાને લઈને ચર્ચા કરી રહી છે. આ મામલાથી જોડાયેલા અહેવાલ અનુસાર Urban Ladderને ખરીદવાને પ્રમુખતા આપવામાં આવી રહી છે અને આ ડીલ આશરે 30 મિલિયન ડોલરમાં થઇ શકે છે. 

કોરોનાના કારણે હોમડિલીવરીની માંગ વધી 

જોકે જ્યારે પણ મીડિયા દ્વારા રિલાયન્સ, Urban Ladder અને Milkbasketનો સંપર્ક કરવામાં આવ્યો ત્યારે તેમના તરફથી કોઈ જવાબ આપવામાં આવ્યો નથી. નોંધનીય છે કે કોરોના વાયરસના ખતરાને જોતા ઘણા બધા લોકો ઘરથી બહાર નીકળીને ખરીદી કરવાનું ટાળી રહ્યા છે અને ઓનલાઈન વસ્તુઓ મંગાવી રયા છે અને એમાં પણ ખાસ કરીને ગ્રોસરી આઈટમની ડિલીવરીની માંગ વધી ગઈ છે. 

જિયો અને મુકેશ અંબાણી પર થઇ રહી છે ધનવર્ષા     

હાલમાં જ રિલાયન્સ કંપનીએ ઓનલાઈન કરિયાણા સ્ટોર JioMart લોન્ચ કરી છે. JioMartનો સીધો મુકાબલો એમેઝોન, વોલમાર્ટ અને ફ્લીપકાર્ટ સાથે છે. આ વર્ષમાં મુકેશ અંબાણીએ દેશ-વિદેશની અનેક કંપનીઓ સાથે કરાર કરીને 20 અબજ ડોલર એકઠા કર્યા છે અને સંપત્તિના મામલામાં સતત આગળ વધી રહ્યા છે.