વિચારણા / દેવું ચૂકવવા રિલાયન્સ હેડક્વાર્ટર વેચવા વિચારી રહ્યા છે અનિલ અંબાણી

દેવાંના બોજ તળે દબાયેલા બિઝનેસ મેન અનિલ અંબાણી મુંબઇમાં પોતાનું હેડક્વાર્ટર વેચવા અથવા લોંગ ટર્મ લીઝ પર આપવા માટે બ્લેકસ્ટોન્સ સહિત કેટલીક ગ્લોબલ પ્રાઇવેટ ઇક્વિટી ફર્મ સાથે વાતચીત કરી રહ્યા છે. જોકે સૂત્રોએ જણાવ્યું હતું કે આ સાઇટને લઇને કાનૂની વિવાદ છે. સૂત્રોના જણાવ્યા અનુસાર અનિલ અંબાણી સાઉથ મુંબઇમાં પોતાની બેલાર્ડ એસ્ટેટ ઓફિસમાં પરત જવાની યોજના બનાવી રહ્યા છે. 

અંબાણીએ તાજેતરમાં જ જણાવ્યું હતું કે રૂ. ૧૮ હજાર કરોડનું દેવું ધરાવતી રિલાયન્સ કેપિટલ દેવાંની ચુકવણી માટે તમામ પ્રયાસ કરી રહી છે. ગ્રૂપની યોજના આ નાણાકીય વર્ષમાં દેવું ૫૦ ટકા ઘટાડવાની છે. શાંતાક્રુઝમાં અનિલ અંબાણી ગ્રૂપનું હેડક્વાર્ટર રિલાયન્સ સેન્ટર સાત લાખ ચો.ફૂટમાં પથરાયેલ છે અને તેને વેચવાથી રૂ. ૧,૫૦૦થી ૨,૦૦૦ કરોડ મળી શકે છે.

એક સૂત્રના જણાવ્યા અનુસાર અનિલ અંબાણી આ પ્રોપર્ટીને લોંગ ટર્મ લીઝ પર આપવા પણ વિચારી રહ્યા છે. અનિલ અંબાણીનું રિલાયન્સ ગ્રૂપ પોતાની રિયલ એસ્ટેટ પ્રોપર્ટીઝ વેચીને કેશ હાંસલ કરવા માગે છે, જેનાથી દેવાનો બોજ ઘટાડી શકાય. રેટિંગ એજન્સીઓએ ગ્રૂપની કેટલીક કંપનીઓનું ક્રેડિટ રેટિંગ ઘટાડી દીધું છે. 

હેડ ક્વાર્ટર વેચવા માટે રિલાયન્સ ગ્રૂપ ઇન્ટરનેશનલ પ્રોપર્ટી કન્સલ્ટન્સી જએલએલને જવાબદારી આપી શકે છે. રિલાયન્સ ગ્રૂપના પ્રવક્તાએ આ વાતને સમર્થન આપતાં જણાવ્યું હતું કે ગ્રૂપના મુંબઇના હેડક્વાર્ટર સહિત રિયલ એસ્ટેટને વેચવા પર વિચારણા કરવામાં આવી રહી છે. બ્લેકસ્ટોને હજુ આ ડીલ પર ટિપ્પણી કરી નથી. રિલાયન્સ ગ્રૂપનું હેડક્વાર્ટર રિલાયન્સ ઇન્ફ્રાસ્ટ્રક્ચરની માલિકીનું છે. આ હેડક્વાર્ટરને લઇને એક કાનૂની વિવાદ પણ છે.