દેશના દિગ્ગજ બિઝનેસમેન અને ઉદ્યોગપતિ મૂકેશ અંબાણીના નેતૃત્વવાળી રિલાયન્સ ઇન્ડસ્ટ્રીઝ લિમિટેડ (આરઆઇએલ)એ બ્રિટનની દિગ્ગજ પેટ્રોલિયમ કંપની બીપી પીએલસીની સાથે એક નવું સંયુક્ત સાહસ રચવાની જાહેરાત કરી છે.
આ બંને કંપનીઓ હવે સાથે મળીને દેશભરમાં એક રિટેલ સર્વિસ સ્ટેશન નેટવર્ક અને એર ટર્બાઇન ફ્યુઅલ (એટીએફ) બિઝનેસ સ્થાપશે. આરઆઇએલના ચેરમેન અને એમડી મૂકેશ અંબાણી અને બીપીના ગ્રૂપ ચીફ એક્ઝિક્યુટિવ બોબ હુડલેએ આ સંયુક્ત સાહસના કરાર પર હસ્તાક્ષર કર્યા હતા.
આ નવા વેન્ચર હેઠળ રિલાયન્સના ૧,૪૦૦ પેટ્રોલપંપોની સાથે નવા પેટ્રોલપંપો વિસ્તરણ કરવામાં આવશે. આ સાહસ હેઠળ આગામી પાંચ વર્ષમાં પેટ્રોલપંપોની સંખ્યા વધારીને ૫,૫૦૦ કરવાનો લક્ષ્યાંક છે. સંયુક્ત સાહસમાં આરઆઇએલના એટીએફ બિઝનેસનો પણ સમાવેશ કરાશે.
નવા કરાર હેઠળ ૩,૫૦૦ નવા પેટ્રોલપંપ ખોલવાની યોજના છે અને ત્યાર બાદ આ જોઇન્ટ વેન્ચર પાસે પેટ્રોલપંપની સંખ્યા પાંચ વર્ષમાં ૫,૫૦૦ થઇ જશે. આ જોઇન્ટ વેન્ચરમાં રિલાયન્સ ઇન્ડ.ની ૫૧ ટકા અને બીપીની ૪૯ ટકા ભાગીદારી હશે. આરઆઇએલ-બીપીનું આ નવું જોઇન્ટ વેન્ચર ૨૦૨૦ સુધીમાં કામ શરૂ કરી દેશે.
આ જાહેર સાહસ રિલાયન્સ ઇન્ડસ્ટ્રીઝ લિ. અને બ્રિટનની કંપની બીપી વચ્ચેની લાંબા ગાળાની ભાગીદારીનું એક પરિણામ છે, જે ૨૦૧૧માં શરૂ થઇ હતી અને ૨૦૧૭માં તેનું વિસ્તરણ થયું હતું. આ ભાગીદારી હેઠળ અલગ અલગ પ્રકારના ઇંધણ અને મોબિલિટી બિઝનેસનેવિકસીત કરવા માટે એકસાથે કામ કરવાના વિકલ્પો તપાસવામાં આવ્યા હતા. આ અંગે અંબાણીએ જણાવ્યું હતું કે ફ્યુઅલ રિટેલિંગ સેક્ટરમાં બીપી દુનિયાની અગ્રણી કંપની છે.