મુકેશ અંબાણીની કંપની રિલાયન્સ ઇન્ડસ્ટ્રીઝ સતત સફળતા શિખર સર કરી રહી છે. આવામાં ખબર આવી રહી છે કે રિલાયન્સ 200 અબજ ડૉલરની માર્કેટ કેપ બનાવતી કંપની બની ગઈ છે.
મહત્વનું છે કે વિદેશી કંપનીઓ રિલાયન્સના વિવિધ પ્લેટફોર્મ પર રોકાણ કરી રહી છે. લોકડાઉન દરમિયાન લગભગ 3 મહિનાની અંદર, રિલાયન્સને તેની પેટાકંપની જિઓ પ્લેટફોર્મ્સ માટે વિશ્વભરના 13 રોકાણકારો પાસેથી લગભગ 1.52 લાખ કરોડનું રોકાણ પ્રાપ્ત કર્યુ છે.
રિલાયન્સ રિટેલમાં પણ રોકાણ
બીજી બાજુ, કંપનીઓ રિલાયન્સ રિટેલમાં પણ રસ બતાવી રહી છે. અમેરિકન ખાનગી ઇક્વિટી કંપની સિલ્વર લેક પાર્ટનર્સે રિલાયન્સ રિટેલમાં હાલમાં જ 7500 કરોડના રોકાણની જાહેરાત કરી છે. જ્યારે મીડિયા રિપોર્ટ્સ પ્રમાણે રિલાયન્સ રિટેલનો 40 ટકા હિસ્સો એમેઝોનને વેચવાની ડીલની શક્યતા જણાઈ રહી છે. આ ડીલ આશરે 20 અબજ ડોલરની હશે તેવું મનાઈ રહ્યું છે.
2 અબજ ડોલરની માર્કેટ કેપ
આ ખબરોની વચ્ચે રિલાયન્સ હવે 200 અબજ ડોલરની માર્કેટ કેપ પ્રાપ્ત કરનાર દેશની પ્રથમ કંપની બની ગઈ છે. શેરની કિંમતમાં નોંધપાત્ર ઉછાળા પછી કંપનીને આ સફળતા મળી છે.
શેરના ભાવ રેકોર્ડ સ્તર પર
ગુરુવારે માર્કેટના કારોબારમાં રિલાયન્સનો શેર 7 ટકાના ઉછાળા સાથે રૂ.2,300 ની વિક્રમી સપાટીને પાર કરી ગયો છે. કારોબારના અંતે, શેર 7.10 ટકા વધીને 2314.65 પોઇન્ટ પર બંધ રહ્યો હતો.
માર્કેટ કેપ કેટલી છે
આજે કારોબારના અંતે, BSE ઈન્ડેક્સ પર રિલાયન્સનું માર્કેટ કેપ રૂ .14,67,350.26 કરોડની નજીક હતું. ઉલ્લેખનીય છે કે રિલાયન્સ ડેડલાઈનના લગભગ 9 મહિના પહેલા જ દેવામુક્ત કંપની બની ગઈ છે.