સુરતના 80 લાખ લોકોને પીવાનુ પાણી પુરુ પાડે છે ઉકાઈ ડેમ
ગુજરાતમાં ભારે વરસાદ વચ્ચે દક્ષિણ ગુજરાતના ખેડૂતો માટે સારા સમાચાર સામે આવ્યા છે. વિગતો મુજબ ખેડૂતોની જીવાદોરી સમાન ઉકાઇ ડેમની સપાટી સતત વધારો થઈ રહ્યો છે. ઉપરવાસમાં ભારે વરસાદને કારણે તાપી જિલ્લાના ઉકાઇ ડેમની જળસપાટીમાં વધારો થયો છે. માહિતી મુજબ 5 દિવસમાં ઉકાઈ ડેમની સપાટી 15 ફૂટ વધી છે. આ સાથે ડેમમાં 1752 MCM પાણીની આવક થઈ ચૂકી છે. નોંધનીય છે કે, ઉકાઈ ડેમ સુરતના 80 લાખ લોકોને પીવાનુ પાણી પુરુ પાડે છે.
ગુજરાતમાં સાર્વત્રિક વરસાદથી સમગ્ર રાજ્યમાં જ્યાં જુઓ ત્યાં પાણી જ પાણી દેખાઈ રહ્યું છે. આ સાથે કેટલીક જગ્યાએ તારાજીના દ્રશ્યો પણ સામે આવી રહ્યા છે. આ તરફ રાજ્યમાં છેલ્લાં ચારેક દિવસથી વરસી રહેલા સાર્વત્રિક વરસાદને પરિણામે રાજ્યના જળાશયો ભરાયા છે. તાપી જિલ્લાના ઉકાઇ ડેમની જળ સપાટીમાં વધારો થયો છે.
5 દિવસમાં ઉકાઈ ડેમની 15 ફૂટ સપાટી વધી
ઉપરવાસમાં ભારે વરસાદને કારણે તાપી જિલ્લાના ઉકાઇ ડેમની જળ સપાટીમાં નોંધપાત્ર વધારો થયો છે. ઉકાઈ ડેમમાં 1752 MCM પાણીની આવક થઈ છે. જેને લઈ ઉકાઇ ડેમની સપાટી 331 ફૂટ પર પહોંચી છે. તમને જણાવી દઈએ કે, ઉકાઇ ડેમનું રુલ લેવલ 333 ફૂટ છે જેમાંથી હાલ ડેમની સપાટી 331 ફૂટ પર પહોંચી છે. નોંધનીય છે કે, ઉકાઈ ડેમ સુરતના 80 લાખ લોકોને પીવાનુ પાણી પુરુ પાડે છે.
નર્મદા ડેમની જળસપાટીમાં પણ વધારો
ગુજરાતની જનતાની તરસ છીપાવનાર સરદાર સરોવર ડેમની જળસપાટીમાં વધારો થયો છે. આ વખતે વરસાદની ધમાકેદાર એન્ટ્રી થતા નર્મદા ડેમની જળ સપાટી એક જ દિવસમાં 50 સેન્ટિમીટર વધી છે. હાલ નર્મદા ડેમની જળસપાટી 119.10 મીટરે પહોંચી છે. ઉપરવાસમાં ભારે વરસાદથી ડેમમાં પાણીની આવક થવા પામી છે. ડેમમાં 48 હજાર 864 ક્યુસેક પાણીની આવક થતા કેનાલ હેડ પાવરહાઉસનું એક યુનિટ કાર્યરત કરવામાં આવ્યુ છે. મહત્વનું છે કે ડેમમાં 1 હજાર 89 મિલીયન ક્યુબિક મીટર જેટલું પાણી સંગ્રહિત છે.
સૌરાષ્ટ્રના ડેમોમાં પાણીની આવક
સૌરાષ્ટ્રમાં સતત મેઘ મહેર જોવા મળી રહી છે. મેઘમહેરના કારણે સૌરાષ્ટ્રના નદી અને ડેમોમાં નવા નીરની આવક થઇ છે. સૌરાષ્ટ્રના નાના મોટા 141 ડેમોમાં 7.2 MCFT પાણીનો વધારો થયો છે. જામકંડોરણના દૂધીવદર પાસે ફોફળ-1 ડેમ ઓવરફ્લો થવાની તૈયારીમાં છે. ભાદર-1, ભાદર-2 અને છાપરવાડી સહિતના ડેમોમાં પાણીની આવક થઇ. ભાદર-2 ડેમ પણ ઓવરફ્લો થવાની તૈયારીમાં છે. સૌરાષ્ટ્રના નાના ચેકડોમો ઓવરફ્લો થયા છે.સૌરાષ્ટ્રમાં હાલ 11 તાલુકામાં વાવણી લાયક વરસાદ થતા ખેડૂતો ખુશખુશાલ થયા છે.