ફાયદો / નવું વર્ષ ઉદ્યોગકારો માટે લઈને આવ્યું ખુશીઓની ભેટ! ગેસના રેટને લઇ 'ગુજરાત ગેસ કંપની'નો મોટો નિર્ણય, જુઓ શું

• સિરામિક ઉદ્યોગ માટે સારા સમાચાર
• નેચરલ ગેસના ભાવમાં 7 રૂપિયાનો ઘટાડો
• ગુજરાત ગેસ કંપનીએ ભાવમાં ઘટાડો કર્યો

નવું વર્ષ મોરબી સિરામિક ઉદ્યોગ માટે ખુશીઓની ભેટ લઈને આવ્યું હોય તેવા સંજોગો વચ્ચે આજે ગુજરાત ગેસ કંપની દ્વારા પાઇપલાઇન નેચરલ ગેસના ભાવમાં રૂપિયા 7નો ઘટાડો કરતા ઉદ્યોગકારોને જબરદસ્ત ફાયદો થયો છે, આંતરરાષ્ટ્રીય બજારમાં ક્રૂડ ઓઈલના ભાવ ઘટતા ગુજરાત ગેસ દ્વારા તેનો સીધો જ ફાયદો મોરબીના સિરામિક ઉદ્યોગ જગતને પાસઓન કરાયો છે.

ગુજરાત ગેસ કંપનીએ નેચરલ ગેસના ભાવમાં કર્યો ઘટાડો
રશિયા-યુક્રેન વચ્ચે ચાલતા યુદ્ધના કારણે નેચરલ પાઈપલાઈન ગેસના ભાવમાં બમણા જેટલો વધારો થયો છે. આ ભાવમાં ધીમે-ધીમે ઘટાડો થવો શરૂ થયો છે. આંતરરાષ્ટ્રીય બજારમાં ગેસના ભાવમાં ઘટાડો થયો છે. જેના કારણે ગુજરાત ગેસ કંપનીએ મોરબી સિરામિક ક્લસ્ટર માટે આપવામાં આવતા નેચરલ ગેસના ભાવમાં 7 રૂપિયાનો ઘટાડો કર્યો છે. 

નેચરલ ગેસના ભાવમાં 7 રૂપિયાનો કરાયો ઘટાડો
ગેસના ભાવમાં ઘટાડા અંગે મોરબી સિરામિક એસોસિયેશનના પ્રમુખ મુકેશભાઈ કુંડારિયાએ નિવેદન આપ્યું છે. તેમણે કહ્યું કે, આ અગાઉ ગેસના ભાવમાં 8.50 રૂપિયાનો ધટાડો થયો હતો. જે બાદ નેચરલ ગેસના ભાવ 53 થયા હતા. જેમાં આજે વધુ રૂપિયા 7નો ઘટાડો કરવામાં આવ્યો છે. જેથી હવે ડૉલરના ભાવની વધઘટ મુજબ અંદાજે 46થી 47 રૂપિયા જેટલા ભાવે ઉદ્યોગકારોને ગેસ મળી શકશે. આમ નવા વર્ષના પ્રારંભે જ ગેસના ભાવમા ઘટાડો થતા ઉદ્યોગકારોને મંદીના કપરા સમયમાં થોડી રાહત મળી શકશે.

ગાંધીનગર ખાતે કરાઈ હતી રજૂઆત
ઉલ્લેખનીય છે કે, ઈન્ડસ્સ્ટ્રીઝના પ્રશ્નો માટે ધારાસભ્ય કાંતિભાઈ અમૃતિયાની આગેવાનીમા ગાંધીનગર ખાતે મોરબી સિરામિક એસોસિએશનના પ્રમુખો દ્વારા રજૂઆતો કરાય હતી. જેને સફળતા મળી છે. વિશ્વના બીજા નંબરના સૌથી મોટા મોરબી સિરામિક ક્લસ્ટરમાં મંદી અને ગેસના ભાવ વધારાના ગ્રહણને કારણે ગુજરાત ગેસની સપ્લાય 55થી 60 લાખ ક્યુબિક મીટર પ્રતિ દિવસથી ઘટીને હાલમાં 18 લાખ ક્યુબિક મીટર પહોંચી જતા ગુજરાત ગેસ કંપનીને મોટો ફટકો પડતા ગેસના ભાવમાં રૂપિયા 7નો ઘટાડો કર્યો છે, છેલ્લા એકાદ મહિનામાં ગુજરાત ગેસ કંપની દ્વારા કુલ મળી રૂપિયા 15થી 16નો ઘટાડો કરવા છતાં પણ હજુ મોરબીના સિરામીક ઉદ્યોગકારો હાઈ સીવી ધરાવતો એલપીજી અને પ્રોપેન ગેસનો વપરાશ કરી ઉત્પાદન ખર્ચ ઘટાડવા મથામણ કરી રહ્યા છે.