રિયાલિટી ચેક / હોશિયાર ગણાતા અમદાવાદીઓ શું બેદરકાર? આવી છે રેડ ઝોન અને ઓરેન્જ ઝોનની સ્થિતિ

• અમદાવાદમાં લોકડાઉનના લીરેલીરા 
• હોટસ્પોટ વિસ્તારમાં નિયમોની ઐસી કી તૈસી 
• રોડ પર ઉમટી ભીડ, જવાબદાર કોણ? 

કોર્પોરેશન દ્વારા જે વિસ્તારોને રેડ ઝોનમાં મુકવામાં આવ્યા છે ત્યાં નિયમોનું પાલન થતું જોવા મળી રહ્યું છે. પરંતુ નિયમોનું પાલન લોકો સ્વંય નથી કરતા પણ પોલીસ દ્વારા કરાવવું પડી રહ્યું છે. VTVએ રેડ ઝોન અને ઓરેન્જ ઝોનની મુલાકાત લીધી હતી. જમાલપુર, ખાડિયા જે વિસ્તારોને રેડ ઝોન જાહેર કરાયા છે. જ્યાં VTVએ જોયું રેડ ઝોનમાં નિયમોનું પાલન થઇ રહ્યું છે. પોલીસનો ડર પણ છે. પોલીસનો ચુસ્ત બંદોબસ્ત છે. અહીં સાચી રીતે લોકડાઉન જોવા મળ્યું હતું. VTV દ્વારા રેડ ઝોનના દિલ્હી દરવાજા વિસ્તારનું ચેકિંગ કરવામાં આવ્યું હતું. ત્યાં પણ પોલીસનો ચુસ્ત બંદોબસ્ત જોવા મળ્યો હતો. રેડઝોનમાં લોકો ગંભીર છે. રોડ-રસ્તા વેરાન છે. પોલીસ એક્શનમાં છે.

ઓરેન્જ ઝોનમાં લોકડાઉનના લીરેલીરા

તો રેડ ઝોન બાદ અમે અમદાવાદના ઓરેન્જ ઝોન વાળા વિસ્તારની મુલાકાત લીધી હતી. ઓરેન્જ ઝોનમાં બાપુનગર, હાટકેશ્વર, નિકોલ, ખોખરા, ઈસનપુર, અમરાઈવાડી સહિતના 42 વિસ્તારને ઓરેન્જ ઝોનમાં સમાવેશ કરવામાં આવ્યો છે. આ વિસ્તારોમાં અમે પહોંચ્યા તો ખુલ્લેઆમ લોકડાઉનના નિયમોનો ભંગ થતો જોવા મળ્યો. લોકો ખુલ્લેઆમ ફરી રહ્યા છે. એટલું જ નહીં સોશિયલ ડિસ્ટસિંગનું અહીં નામોનિશાન જોવા ન મળ્યું. લોકડાઉનના નિયમોની ઐસી કી તૈસી લોકો કરી રહ્યા છે. 

રેડ અને ઓરેન્જ ઝોનમાં અમારા રિયાલીટી ચેકમાં એ સામે આવ્યું કે રેડ ઝોનમાં તો ખાખીના ખૌફને કારણે ગંભીરતા જોવા મળી. પરંતુ ઓરેન્જ ઝોનમાં લોકો ખુલ્લેઆમ નિયમનો ભંગ કરતા જોવા મળ્યા. કારણ કે અહીં પોલીસનો કોઈ બંદોબસ્ત હતો નહીં. લોકોએ સ્વયં સમજવું પડશે કે લોકડાઉનનું અમલીકરણ કરવું પડશે અને ઘરમાં જ રહેવું પડશે. આ લોકો ક્યારે સુધરશે?