એલર્ટ / આ રાજ્યમાં ભારે વરસાદને લઈને રેડ એલર્ટ જાહેર કરાયું, મોટી હોનારત ટાળવા NDRFની ટીમ તૈનાત

• બિહારના 8 જિલ્લામાં ભારે વરસાદ માટે રેડ એલર્ટ જાહેર કરાયું છે
• NDRFની ટીમ તૈનાત કરવામાં આવી છે
• ઉત્તર બિહારમાં ખાસ ભારે વરસાદની સંભાવના છે

હવામાન વિભાગે જે જિલ્લામાં રેડ એલર્ટ જાહેર કર્યું છે તેમાં પશ્ચિમ ચંપારણ, પૂર્વ ચંપારણ, ગોપાલગંજ, સીવાન, અરરિયા, કિશનગંજ, કટિહાર અને સહરસાનો સમાવેશ થાય છે. જોકે રાજધાની પટણા માટે તે રાહતની વાત છે કારણ કે હવામાન વિભાગે અહીં હળવા વરસાદની આગાહી કરી છે.

આ સાથે જ હવામાન વિભાગે પણ આગામી 24 કલાકમાં નેપાળના નીચાણવાળા વિસ્તારોમાં ભારે વરસાદની ચેતવણી આપી છે. હવામાન વિભાગની ચેતવણી જોઇને તમામ જિલ્લા કલેક્ટરોને પણ સાવચેત રહેવા જણાવાયું છે. હવામાન વિભાગે જણાવ્યું છે કે ભારે વરસાદ, નીચા સ્થળોએ પાણી ભરાવું, ટ્રાફિક જામ થવો, વીજળીની સમસ્યા અને નદીના પાણીના સ્તરમાં વધારો થવાને કારણે જાન-માલનું નુકસાન થવાની પણ સંભાવના છે.

તેથી, તમામ નદીઓના ડેમનું નિરીક્ષણ પણ વધારવામાં આવ્યું છે. ઉલ્લેખનીય છે કે, બે દિવસ પહેલા હવામાન વિભાગે બિહારમાં ભારે વરસાદનું એલર્ટ જાહેર કરી ચેતવણી  આપી હતી. આ સાથે જ ફરી એકવાર હવામાન વિભાગે એલર્ટ જારી કર્યુ છે. ત્યારબાદ તમામ જિલ્લાઓમાં એનડીઆરએફની ટીમ તૈનાત કરવામાં આવી છે. તેઓએ આ જિલ્લાઓમાં મોટી અને નાની બોટોનું સંચાલન પણ કર્યુ છે. ડિઝાસ્ટર મેનેજમેન્ટ વિભાગ પોતે જ તમામ જિલ્લાઓ પર નજર રાખી રહ્યું છે.