હાલના શિક્ષકોની ટર્મ પૂરી થતાં ટેમ્પરરી એક્સટેન્શન
MS યુનિ.માં આજથી હંગામી શિક્ષકોની ભરતી પ્રક્રિયા શરૂ કરવામાં આવી છે. ઇન્ટરવ્યૂમાં પસંદ થયેલા ઉમેદવારોને નિમણૂંકપત્ર આપવામાં આવશે.આ યુનિવર્સિટીમાં મોટાભાગની ફેકલ્ટીમાં શૈક્ષણિક પોસ્ટ ખાલી હોવાથી હંગામી શિક્ષકોની 11 મહિના માટે ભરતી કરવામાં આવે છે. મહત્વનું છે કે હાલમાં ફરજ બજાવતા હંગામી શિક્ષકોની ટર્મ 21 જૂનના રોજ પૂર્ણ થઇ ગઇ છે પરંતુ સંપૂર્ણ રીતે જ્યાં સુધી ભરતી પ્રક્રિયા પૂર્ણ ન થાય ત્યાં સુધી હાલના શિક્ષકોને ટેમ્પરરી એક્સટેન્શન આપવામાં આવ્યું છે.
હંગામી શિક્ષકોને ટેમ્પરરી એક્સટેન્શન
મહત્વનું છે કે હાલ MS યુનિ.ની 695 પોસ્ટ ખાલી છે. જેની પર આજથી હંગામી શિક્ષકોની ભરતી શરૂ થશે. સામાન્ય રીતે MS યુનિ.ની 14 ફેકલ્ટી સહિત 3 કોલેજોમાં એપ્રિલ માસમાં હંગામી શિક્ષકોની ભરતી કરવામાં આવતી હોય છે. જેથી જૂન મહિનામાં 11 મહિનાનો કરાર પુરો થઇ જાય તે પહેલા નવી ભરતી થઇ જાય તો શૈક્ષણિક કામમાં મુશ્કેલી ન આવે. પરંતુ સત્તાધીશોની મુંઝવણ તેમજ સરકાર સાથે સંકલનના અભાવને કારણે ભરતી પ્રક્રિયામાં વિલંબ થયો હતો.
695 ખાલી જગ્યાઓ માટે ભરતી પ્રક્રિયા
ઉલ્લેખનીય છે કે એમએસ યુનિવર્સિટીમાં રાજ્ય સરકારના મહેકમ અનુસાર 1252 શૈક્ષણિક જગ્યા છે જેમાંથી 557 ભરાયેલી જ્યારે 695 જગ્યાઓ ખાલી છે. આથી શૈક્ષણિક કાર્યમાં કોઇ અડચણ ન આવે તે માટે દર વર્ષે મોટી સંખ્યામાં હંગામી શિક્ષકોની 11 મહિનાના કોન્ટ્રાક્ટ પર ભરતી કરવામાં આવે છે.