રેકોર્ડ / એક જ દિવસમાં 20 લાખ ડોઝથી રસીકરણ અભિયાનમાં બન્યો રેકોર્ડ : જાણો અત્યાર સુધી કેટલા લોકોને અપાઈ રસી

• ભારતમાં લોકોને અપાઈ રહી છે કોરોનાની વેક્સિન 
• 56માં દિવસે 20 લાખથી વધારે લોકોને અપાઈ રસી 
• એક દિવસમાં સૌથી વધુ રસી અપાઈ હોવાનો રેકોર્ડ 

કોરોના વાયરસ સામે ભારતમાં મહાઅભિયાન ચલાવવામાં આવી રહ્યું છે જેમાં દેશના નાગરિકોને કોરોના સામે લડવા માટે વેક્સિન આપવામાં આવી રહી છે ત્યારે આજે 56માં દિવસે કુલ 20 લાખ 53 હજાર લોકોને વેક્સિન આપવામાં આવી છે. કેન્દ્રીય સ્વાસ્થ્ય મંત્રાલય દ્વારા કહેવામાં આવ્યું છે કે શુક્રવારે કોરોના વેક્સિનેશને બધા જ રેકોર્ડ તોડી નાંખ્યા છે. મંત્રાલય દ્વારા શનિવારે આ મુદ્દે જાણકારી આપવામાં આવી છે.  

સ્વાસ્થ્ય મંત્રાલય અનુસાર 20,53,537માંથી 16,39,663 લોકો એવા છે જેમને આજે કોરોના વેક્સિનનો પહેલો ડોઝ આપવામાં આવ્યો છે. જ્યારે 4,13,874 લોકોને બીજો ડોઝ આપવામાં આવ્યો છે. કેન્દ્ર સરકારના આંકડા અનુસાર કુલ 2.82 કરોડ લોકોને કોરોના વેક્સિનના ડોઝ આપી દેવામાં આવ્યા છે. 

મંત્રાલય દ્વારા નિવેદનમાં કહેવામાં આવ્યું છે કે ભારતમાં 16 જાન્યુઆરીએ દેશવ્યાપી રસીકરણ અભિયાન શરૂ કરવાં આવ્યું હતું જેમાં મહત્વનો પડાવ પાર કરવામાં આવ્યો છે. રસીકરણના 56માં દિવસે 20 લોકોને ડોઝ આપવામાં આવ્યા છે. નિવેદનમાં કહેવામાં આવ્યું કે દિવસમાં આપવામાં આવતા ડોઝની સંખ્યામાં આ સૌથી વધારે છે. 

શુક્રવારે આપવામાં આવેલા રસીના ડોઝમાં 74 ટકા રસીના ડોઝ આઠ રાજ્યોમાં આપવામાં આવ્યા છે. સૌથી વધારે 3.3 લાખ ડોઝ યુપીમાં આપવામાં આવ્યા છે. 

કોરોના વાયરસ કેસ અપડેટ 

ભારતમાં કોરોના વાયરસના કેસની સંખ્યામાં દિનપ્રતિદિન વધારો જોવા મળી રહ્યો છે. શનિવારે સવારે છેલ્લા 24 કલાકમાં 140 લોકોએ કોરોના વાયરસના કારણે પોતાના જીવ ગુમાવ્યા છે જ્યારે 24,882 લોકો કોરોના વાયરસની ઝપેટમાં આવી ગયા છે. કોરોના વાયરસના એક્ટિવ કેસની સંખ્યામાં પણ વધારો થયો છે અને એક્ટિવ કેસની સંખ્યા 2 લાખને પાર થઈ ગઈ છે. 

છ રાજ્યોમાં કોરોના કેસ વધ્યા 

ભારતમાં છ એવા રાજ્યો છે જ્યાં કોરોના કેસ વધી રહ્યા છે. મહારાષ્ટ્ર, પંજાબ, મધ્ય પ્રદેશ, ગુજરાત, છત્તીસગઢ, કેરળ, તમિલનાડુમાં કોરોના વાયરસના કેસમાં વધારો જોવા મળી રહ્યો છે. યુપી બિહારમાં પરિસ્થિતિ હાલ તો સામાન્ય દેખાઈ રહી છે.