રાજકોટમાં છેલ્લા 102 વર્ષમાં સૌથી વધુ વરસાદ નોંધાયો છે. રાજકોટમાં ભારે વરસાદે વર્ષોનો રેકોર્ડ તોડ્યો છે. ચાલુ વર્ષે રાજકોટમાં 59 ઇંચ વરસાદ નોંધાયો છે. જે 1917થી અત્યાર સુધીમાં સૌથી વધુ છે. એટલે કે હવે આ વર્ષે રાજકોટ વાસીઓને પાણીની કોઇ અછત નહીં રહે કારણે કે મોટાભાગના ડેમ છલકાઇ ગયા છે.
રાજકોટમાં 59 ઇંચ વરસાદ નોંધાયો
છેલ્લે 1917માં નોંધાયો હતો સૌથી વધુ વરસાદ
નદી-નાળાને ડેમ છલકાયા
રાજ્યમાં આ વર્ષે સિઝનનો 130 ટકા જેટલો વરસાદ વરસી ચુક્યો છે ત્યારે રાજ્યભરમાં આનંદનો માહોલ છે અને રાજકોટમાં તો વરસાદે 102 વર્ષ જૂનો રેકોર્ડ તોડીને નવો વિક્રમ સ્થાપ્યો છે.
રાજકોટમાં નદી નાળા છલાકાયા
રાજકોટમાં નદી નાળા છલકાઈ ગયા છે અને આ વરસે પાણીની કોઈ તંગી નહી રહે. 102 વર્ષથી તરસ્યા રાજકોટને આ વર્ષે અઢળક પાણી મળ્યુ છે. રાજકોટમાં ભારે વરસાદને પગલે ભાદર ડેમ -1 ત્રીજી વખત ઓવરફલો થયો છે. પાણીની સતત આવકના કારણે ડેમના છ દરવાજા ખોલવામાં આવ્યા છે. રાજકોટના ગોંડલ પાસે આવેલો મોતિસર ડેમ ફરીથી ઓવરફ્લો થયો છે. હડમતાલા, કોલીથડ, ગરનાળા સહિતના ગામોને એલર્ટ કરવામાં આવ્યા છે.
આજી ડેમ છલકાયો
આ વખતે રાજકોટના નદી નાળા છલકાઈ ગયા છે. આજી ડેમમાં પાણીના ઓવરણાં લેતા રાજકોટવાસીઓમાં આ વાતને લઈને ખુશીનો માહૌલ જોવા મળી રહ્યો છે. દર વર્ષે ઉનાળામાં પાણીની તંગીનો વિકટ પ્રશ્ન આવીને ઉભો રહે છે પણ આ વર્ષે પૂરતુ પાણી છે.
હજુ વરસાદ પડશે તેવી હવામાન વિભાગની આગાહી
સૌરાષ્ટ્રમાં હજુ ભારે વરસાદ પડે તેવી હવામાન વિભાગે આગાહી કરી છે. સુરેંદ્રનગર, બોટાદ, અમરેલી,જૂનાગઢમાં ભારે વરસાદ પડે તેવી હવામાન વિભાગે આગાહી કરી છે. નવરાત્રિના શરૂઆતના ત્રણ દિવસ સુથી વરસાદી માહોલ જોવા મળશે.