કેન્દ્રીય નાણા પ્રધાન અને સરકાર ભલે GST દર વધારવા અંગે ઇન્કાર કરી રહ્યા હોય, પરંતુ અહેવાલો અનુસાર GST કમિટીએ ટેકસના બે દર રાખવાનો પ્રસ્તાવ રજૂ કર્યો છે. એટલું જ નહીં કેટલીક પ્રોડકટ પર GSTના દર વધારવાની પણ ભલામણ કરી છે.
ટેક્સના બે દર રાખી વધુ આઈટમ પર જીએસટી લગાવવા સમિતિની ભલામણ
લકઝરી ગુડ્સ પર સ્પેશિયલ હાયર રેટ લગાવવા જીએસટી સમિતિનો પ્રસ્તાવ
GST કોમ્પેનસેશન સેસમાં રૂ.૬૦,૦૦૦ કરોડથી વધુ ઘટાડો થવાનું અનુમાન છે
GST રેવન્યુ કલેકશનમાં સુધારાની ભલામણ માટે રચાયેલી સમિતિએ GST દર વધારવા અને કેટલીક છૂટ ધરાવતી વસ્તુઓને GSTના દાયરામાં લાવવાની સલાહ આપી છે.
સૂત્રોના જણાવ્યા અનુસાર GST કાઉન્સિલે હાલ દર વધારવા અંગે કોઇ નિર્ણય લીધો નથી, પરંતુ લાંબા સમય સુધી દર વધારવાનો નિર્ણય ટાળી શકાશે નહીં. તેનું મુખ્ય કારણ એ છે કે ચાલુ નાણાકીય વર્ષમાં GST કોમ્પેનસેશન સેસમાં રૂ.૬૦,૦૦૦ કરોડથી વધુ ઘટાડો થવાનું અનુમાન છે.
GST સમિતિએ પ્રથમ વિકલ્પ એવો આપ્યો છે કે GST હેઠળ ૧૦ અને ર૦ ટકા એમ બે ટેકસ રેટ નક્કી કરવામાં આવે. જ્યારે લકઝરી ગુડસ પર સ્પેશિયલ હાયર રેટ રાખવામાં આવે અને કોસ્મેટિક, ગેમ્બલિંગ જેવી આઇટમો પર સેસ લગાવવામાં આવે. વર્તમાન દરોમાં વધારો કરવામાં આવે અને મોંઘવારીના દર સાથે સેસના રેટને લિંક કરવામાં આવે.
જ્યારે જીએસટી કમિટીએ બીજો વિકલ્પ એ આપ્યો છે કે જીએસટી મુકત પ્રોડકટસ પર જીએસટી લગાવવામાં આવે અને હેલ્થ, એજ્યુકેશન જેવી ચુનંદી સેવાઓ પર દર વધારવામાં આવે. સોના-ચાંદી પર જીએસટી ત્રણ ટકાથી વધારીને પાંચ ટકા કરવામાં આવે. મોબાઇલ પર જીએસટી ૧ર ટકાથી વધારીને ૧૮ ટકા કરવામાં આવે. પાંચ ટકાવાળી આઇટમ પર જીએસટી ૧ર ટકા કરવામાં આવે અને ૧ર ટકાવાળી આઇટમ પર જીએસટી ૧૮ ટકા લગાવવામાં આવે.