રેસિપિ / આ રીતે ઘરે બનાવી લેશો મેથિયાનો મસાલો તો મળશે અથાણાને ચટાકેદાર સ્વાદ, જાણો અથાણું બનાવવાની ખાસ ટિપ્સ પણ

• ગરમીમાં કરી લો અથાણાની તૈયારી
• ઘરે બનાવી લો મેથિયાનો ખાસ મસાલો
• અથાણુ બનાવતા ધ્યાન રાખો આ ટિપ્સ

ગુજરાતના લોકો અથાણાંના બહુ શોખીન હોય છે. અને એટલે જ ગુજરાતીના ઘરે તમને અથાણાંની ૫-૬ બરણીઓ તો જોવ મળી જ જાય. તો તમે પણ જાણી લો આ અથાણાનો ખાસ મસાલો બનાવવાની પરફેક્ટ રીત પરફેક્ટ માપ સાથે.

અથાણાંનો મેથિયો મસાલો

સામગ્રી

-250 ગ્રામ મેથીના કુરિયા
-100 ગ્રામ રાઈના કુરિયા
-300 ગ્રામ મીઠું
-300 ગ્રામ લાલ મરચું પાઉડર
-300 ગ્રામ તેલ
-2 ચમચી હિંગ

રીત

સૌપ્રથમ એક મોટું તપેલું લઈ તેમાં પહેલાં મીઠું પાથરી દેવું. ત્યાર બાદ તેની ઉપર રાઈના કુરિયા અને તેના પણ ઉપર મેથીના કુરિયા પાથરવા. તેની પર હિંગનો ઢગલો કરવો. તેલ ગરમ કરવું. પછી આ ગરમ તેલ તપેલામાં રેડી દેવું. તપેલું તરત ઢાંકી દેવું. ઠંડું થાય એટલે બરાબર હલાવી મરચું ભેગું કરવું. પછી આ મસાલો કાચની બરણીમાં ભરી દેવો. જરૂર પડયે આ મસાલો ઉપયોગમાં લેવો. ૧૨ મહિના સુધી આ મસાલો સારો રહે છે.

અથાણું બનાવતા પહેલા કામની છે આ ટિપ્સ

-અથાણા માટેના શાક અને ફળ તાજા અને રસભર્યા હોય તે જરૂરી છે.
- મસાલા મિક્સ કરતાં પહેલાં શાકને ધોઇને સૂકવી લેવા.
- અથાણું બનાવવા જાડા તળિયાના વાસણનો ઉપયોગ કરો. 
- અથાણું બનાવવાનું વાસણ કોરું હોય તે ધ્યાન રાખો. 
- અથાણું તૈયાર થાય નહીં ત્યાં સુધી તેને કપડું બાંધીને સમયાંતરે તડકે મૂકો.
- રોજ વાપરવા માટેના અથાણાને નાની બરણીઓમાં કાઢીને વાપરો.
- અથાણાની બરણીને સારી રીતે  બંધ કરો. જો તે ફિટ બંધ નહીં થાય તો તેમાં થોડા સમય બાદ ફંગસ જોવા મળશે.
- જ્યારે પણ અથાણું કાઢો ત્યારે સાફ અને કોરા ચમચાનો ઉપયોગ કરો.
- જે અથાણું આખું વર્ષ રહેવા દેવાનું હોય તે તેલમાં ડૂબેલું રહે તે આવશ્યક છે. માટે અથાણું કાઢો ત્યારે આ વાતનું ખાસ ધ્યાન રાખો.