લક્ઝરી હોટલમાં 8 દિવસ સુધી ધામા નાખ્યા હતા ત્યાંનું સંપૂર્ણ બિલ મહારાષ્ટ્રના સીએમ એકનાથ શિંદે વતી ચૂકવી દેવાયું
બળવાખોર ધારાસભ્યો લક્ઝરી હોટલમાં 8 દિવસ સુધી ધામા નાખ્યા હતા
ઓછામાં ઓછા 68 થી 70 લાખ રૂપિયા ભાડા તરીકે ચૂકવવામાં આવ્યા
હોટલના અલગ-અલગ ફ્લોર પર કુલ 70 રૂમ બુક કરાયા, ભોજનના 22 લાખ રૂપિયા
મહારાષ્ટ્રમાં રાજકીય ડ્રામા બાદ હવે એકનાથ શિંદેએ મુખ્યમંત્રી પદના શપથ ગ્રહણ કર્યા છે. આ તરફ બળવાખોર શિવસેના જૂથના ધારાસભ્યો અને તેમના નેતાઓ ગુવાહાટીની જે લક્ઝરી હોટલમાં 8 દિવસ સુધી ધામા નાખ્યા હતા ત્યાંનું સંપૂર્ણ બિલ મહારાષ્ટ્રના સીએમ એકનાથ શિંદે વતી ચૂકવી દીધું છે.આ માહિતી હોટેલ રેડિસન બ્લુમાંથી જાણવા મળી છે. જો કે કેટલું બિલ આવ્યું તે અંગે કોઈ વાત કરવા તૈયાર નથી, પરંતુ સૂત્રો પાસેથી જાણવા મળ્યું છે કે ઓછામાં ઓછા 68 થી 70 લાખ રૂપિયા ભાડા તરીકે ચૂકવવામાં આવ્યા છે.
હોટલના અલગ-અલગ ફ્લોર પર કુલ 70 રૂમ બુક કરાયા હતા
પ્રાપ્ત માહિતી અનુસાર, હોટલના અલગ-અલગ ફ્લોર પર કુલ 70 રૂમ બુક કરવામાં આવ્યા હતા. આ સાથે, હોટેલ મેનેજમેન્ટે 22 જૂનથી 29 જૂન સુધી બહારથી આવતા લોકો માટે રેસ્ટોરાં, ભોજન સમારંભ અને સુવિધાઓ બંધ કરી દીધી હતી. હોટલ સાથે જોડાયેલા એક અધિકારીએ નામ ન આપવાની શરતે ન્યૂઝ એજન્સી પીટીઆઈને જણાવ્યું કે મહારાષ્ટ્રના ધારાસભ્યો અહીં સામાન્ય મહેમાનોની જેમ રોકાયા હતા. તેમના વતી સંપૂર્ણ નાણાં ચૂકવવામાં આવ્યા છે. જોકે, આ અધિકારીએ બિલની રકમ વિશે કહેવાનો ઈન્કાર કર્યો છે. જો કે, એવી માહિતી આપવામાં આવી છે કે ધારાસભ્યોને સુપિરિયર અને ડીલક્સ કેટેગરીના રૂમમાં રાખવામાં આવ્યા હતા.
8 દિવસના ભોજનમાં 22 લાખ રૂપિયા ?
હોટેલ રેડિસન બ્લુની વેબસાઈટ અનુસાર, અલગ-અલગ રૂમના ભાડા ડાયનેમિક હોય છે, એટલે કે ફ્લાઈટ ટિકિટની જેમ તેમની કિંમત પણ ઉપલબ્ધતાના આધારે નક્કી કરવામાં આવે છે. સૂત્રોના જણાવ્યા અનુસાર હોટલમાં એક રૂમનું ભાડું સામાન્ય રીતે 7500 થી 8500 સુધી હોય છે. આ ડિસ્કાઉન્ટ અને ટેક્સ સહિત લગભગ 68 લાખ થાય છે. તેમના 8 દિવસના ભોજનમાં 22 લાખ રૂપિયા સુધીનો ખર્ચ થયો હોવાનો અંદાજ છે. જ્યારે હોટેલ અધિકારીઓને પૂછવામાં આવ્યું કે શું ધારાસભ્યોએ અન્ય કોઈ સુવિધાઓનો લાભ લીધો છે, ત્યારે તેઓએ કહ્યું કે તેઓએ સ્પા વગેરે જેવી વધારાની સેવાઓનો લાભ લીધો નથી.
નોર્થ ઈસ્ટની એકમાત્ર ફાઈવ સ્ટાર હોટેલ છે રેડિસન બ્લુ
શિવસેના સાથે બળવો કર્યા પછી એકનાથ શિંદેના નેતૃત્વમાં આ ધારાસભ્યો 22 જૂનથી મુંબઈથી 2700 કિલોમીટર દૂર ગુવાહાટીમાં રોકાયા હતા. આ તમામ ધારાસભ્યો બુધવારે ગોવા ગયા છે. મહત્વનું છે કે, રેડિસન બ્લુ હોટેલ નોર્થ ઈસ્ટની એકમાત્ર ફાઈવ સ્ટાર હોટેલ છે.