આવ..રે..આવ / દક્ષિણ ગુજરાતથી 3 જિલ્લામાં વરસાદની રિ-એન્ટ્રી, સૌરાષ્ટ્ર અને મધ્યગુજરાત માટે જાણો શું છે આગાહી

• વલસાડ જિલ્લામાં સતત બીજા દિવસે વરસાદ
• ડાંગ જિલ્લામાં સાર્વત્રિક વરસાદ
• નવસારી શહેર, જલાલપોર, ગણદેવી, વાંસદામાં વરસાદ

ગુજરાતમાં વરસાદ ખેંચાવવાથી ખેડૂતોના માથે ચિંતાના વાદળ છવાયા છે. ત્યારે હજુ પણ મોડું ન થયું હોય તેવી રીતે હવામાન વિભાગની આગાહી વચ્ચે નવસારીમાં વરસાદ વરસ્યો છે. દક્ષિણ ગુજરાતમાં વરસાદની આગાહી ધીમે ધીમે સાચી પડતી દેખાઈ રહી છે. ત્યારે ગુજરાતના એકસાથે 3 જિલ્લામાં સારો વરસાદ વરસ્યો છે. તો આ તરફ મધ્ય ગુજરાત ખાતે અમદાવાદમાં પણ કેટલાક વિસ્તારમાં ઉકળાટ પછી છાંટા પડ્યા હતા. 

દક્ષિણ ગુજરાતમાંથી વરસાદની રિ-એન્ટ્રી
જૂન મહિનાનો વરસાદ સપ્ટેમ્બર સુધી ખેંચાઈ તેવું ઓછું જોવા મળતું હોય છે. પરંતુ આ વર્ષે ઓગસ્ટ મહિનાની 19 તારીખ સુધી વરસાદની અછત ખેડૂતોના માથે ચિંતા વધારી દીધી છે. પરંતુ હવે લાગે છે કે, દક્ષિણ ગુજરાતથી વરસાદની રિ-એન્ટ્રી થઈ રહી છે. ત્યારે નવસારી, જલાલપોર,ગણદેવીમાં વરસાદ ખાબક્યો હતો. આ સાથે વાંસદા, ખેરગામ, ચીખલી તાલુકામાં વરસાદ નોંધાયો છે. નવસારી શહેરના અનેક વિસ્તારોમાં ધીમીધારે વરસાદ આવતા લોકોને રાહત અનુભવાઈ છે. 

નવસારી, વલસાડ અને ડાંગમાં નોંધાયો વરસાદ

નવસારીની સાથે વલસાડ જિલ્લામાં સતત બીજા દિવસે વરસાદ વરસી રહ્યો છે. જેના કારણે નીચાણવાળા વિસ્તારોમાં પાણી ભરાયા છે. છીપવાડ રેલવે ગરનાળામાં વાહનચાલકો ફસાયા હતા.સૌથી વધુ પારડી, ધરમપુર, ઉમરગામમાં વરસાદ નોંધાયો છે. તો ગુજરાતમાં પ્રવાસીઓનું પસંદગીવાળા ડાંગ જિલ્લામાં પણ સાર્વત્રિક વરસાદ નોંધાયો હતો. તમામ તાલુકાઓમાં વરસાદ નોંધાયો છે. જેમાં અંબિકા અને ખાપરી નદી-બે કાંઠે વહેતી થઈ હતી. કોઝ-વે ઉપર પાણી ફરી વળતા વાહનવ્યવહાર બંધ કરાયો. ડાંગના આહવામાં સૌથી વધુ વરસાદ નોંધાયો હતો. વઘઈ, સુબિર અને સાપુતારામાં પણ વરસાદથી ફરી હરયાળી જોવા મળશે. અને પ્રવાસીઓનો ઘસારો જોવા મળશે. 

રાજ્યમાં ફરી ચોમાસું સક્રિય થતા ખેડૂતોમાં ખુશી જોવા મળી રહી છે. લાંબા વિરામ બાદ મેઘરાજા ફરી મહેરબાન થતા હવે ખેડૂતો પાકને લઈ ચિંતા મૂક્ત બન્યા છે ત્યારે હવામાન વિભાગે રાજ્યમાં સારા વરસાદની આગાહી કરતા જણાવ્યું છે કે  સિસ્ટમ સક્રિય થતા હવે ફરી વરસાદી  માહોલ જામશે, રાજ્યના અનેક જિલ્લાઓમાં સારો એવો વરસાદ નોંધાઈ શકે છે.  દક્ષિણ ગુજરાત, મધ્ય ગુજરાત સહિત સૌરાષ્ટ્રના અનેક પથંકમાં વહામાન વિભાગે સારા વરસાદની આગાહી કરી છે. 

રાજ્યમાં ફરીથી સક્રિય થયું ચોમાસું
હવામાન વિભાગના જાણાવ્યા અનુસાર સૌરાષ્ટ્રમાં ભાવનગર, રાજકોટ, દ્વારકા સહિત અનેક વિસ્તારોમાં ભારેથી અતિભારે વરસાદની આગાહી કરવામાં આવી રહી છે. ત્યારે આ તરફ ડાંગ, તાપી, સુરત, નવસારી, વલસાડ સહિત અનેક પંથકમાં મધ્યમથી ભારે વરસાદ નોંધાઈ શકે તેવું હવામાન વિભાગે જણાવ્યું છે. પોરબંદર અને ગીર સોમનાથમાં વરસાદની આગાહી કરતા ઉત્તર ગુજરાતના ગ્રામ્ય વિસ્તારોમાં પણ હવામાન વિભાગે વરસાદ પડવાની સંભાવનાઓ વ્યક્ત કરી છે. 

રાજ્યમાં અનેક વિસ્તારમાં વરસાદની આગાહી
હવામાન વિભાગના જણાવ્યા અનુસાર બંગાળની ખાડીમાં લો પ્રેશર નબળુ થતા અતિભારે વરસાદની શક્યતા નહીવત જણાઈ રહી છે પરતું લો પ્રશેરની અસરથી રાજ્યમાં સારો વરસાદ રહેશે તેવું હવામાન વિભાગે જણાવ્યું છે. હવામાન વિભાગે કરી વરસાદની આગાહી કરતા રાજ્યના મહાનગરોમાં પણ સારો વરસાદ પડી શકે છે તેવું જણાવ્યું છે.