આઇપીએલ 2019 / ફરી હારી કોહલીની બેંગલોર ટીમ, મુંબઇનો 5 વિકેટે વિજય

હાર્દિક પંડયાની શાનદાર 37 રનની અણનમ ઇનિંગ્સ તેમજ મલિંગાએ ઝડપેલ 4 વિકેટના પ્રદર્શનની મદદથી મુંબઇની ટીમે બેંગ્લોરને 5 વિકેટે પરાજય આપ્યો. આ પરાજય સાથે જ ઇન્ડીયન ટી-20 લીગમાં વિરાટ કોહલીના નેતૃત્વવાળી રોયલ ચેલેન્જર્સ બેંગ્લોરની ટીમનું પ્લેઓફમાં જગ્યા બનાવવાનું મુશ્કેલ બની ગયું છે. 
 
મુંબઇ ખાતે રમાયેલ મેચમાં બેંગ્લોરની ટીમે ટોસ જીતીને પ્રથમ બેટિંગ કરતાં મુંબઇ સામે 171 રનનો લક્ષ્યાંક રાખ્યો હતો. લક્ષ્યનો પીછો કરવા મેદાનમાં ઉતરેલી મુંબઇની ટીમે એક ઓવર બાકી રહેતા પુરો કરી દીધો. મુંબઇની આ જીતના મુખ્ય હીરો ઓલરાઉન્ડર હાર્દિક પંડયા તેમજ ફાસ્ટ બોલર લસિથ મલિંગ રહ્યા. હાર્દિક પંડયાએ 16 બોલમાં 5 બાઉન્ડ્રી તેમજ 2 સિક્સરની મદદથી 37 રન બનાવી ટીમને જીત અપાવી. જ્યારે મલિંગાએ તેની શાનદાર બોલિંગ કરી 4 વિકેટ ઝડપતાં મેન ઓફ ધ મેચ જાહેર કરાયો. 
 
બેંગ્લોરની ટીમ તરફથી ડિવિલિયર્સે 75 તેમજ મોઇન અલીએ 50 રનની શાનદાર અર્ધશતકીય ભાગીદારી નોંધાવી. જેની મદદથી  બેંગ્લોરની ટીમે મુંબઇ સામે 172 રનનો લક્ષ્ય રાખ્યો હતો. મુંબઇની ટીમના આ જીત સાથે 10 પોઇન્ટ થઇ ગયા છે અને આઇપીએલના પોઇન્ટ ટેબલમાં ત્રીજા સ્થાને પહોંચી ગયું છે. 
 
મુંબઇ તરફથી સુકાની રોહિત શર્માએ 28 તેમજ ડી કોકે 40 રનની શાનદાર ઇનિંગ્સ સાથે તેજ શરૂઆત કરી હતી. આ ઓપનિંગ જોડીએ સાત ઓવરમાં 70 રનનો વિશાળ સ્કોર કરી દીધો. જો કે આ જોડીને તોડવામાં મોઇન અલીને સફળતા મળી હતી. મોઇન અલીએ એક જ ઓવરમાં બંને ખેલાડીઓને આઉટ કરી દીધા.