ખાતેધારકો ખસ્તાહાલ / વધુ એક બૅંકનું ભોપાળું : RBIએ લગાવ્યો પ્રતિબંધ, 6 મહિના સુધી એક હજારથી વધુ નહીં ઉપાડી શકાય

• ખાતેધારકો છ મહિના સુધી 1000 થી વધારે ઉપાડી નહીં શકે 
• ડિક્કન અર્બન કો-ઓપરેટીવ બેન્ક નવી લોન નહીં આપી શકે
• બેન્ક કોઈ નવું રોકાણ પણ નહીં કરી શકે 

આરબીઆઈના પ્રતિબંધ બાદ ડિક્કન અર્બન કો-ઓપરેટીવ બેન્ક લિમિટેડ હવે પછી કોઈ નવી લોન નહીં આપી શકે કે ખાતેધારકો પાસેથી પૈસા પણ સ્વીકારી નહીં શકે. આરબીઆઈએ ઉપાડની મર્યાદા પણ સીમિત કરી નાખીને ખાતેધારકોને છ મહિના સુધી ફક્ત રુપિયા 1000 ઉપાડવાની મંજૂરી આપી છે. 

પ્રતિબંધોથી બેન્કનું લાઈસન્સ રદ નહીં થાય 

જોકે આરબીઆઈએ સાથે ખુલાસો પણ કર્યો છે કે આ પ્રતિબંધનો અર્થ બેન્કનું લાઈસન્સ રદ કરવો એવો જરાય નથી. બેન્ક તેનો હમેંશ મુજબનો કારોબાર કરતી રહેશે પરંતુ આરબીઆઈના આ પ્રતિબંધનો અધીન રહીને. ડિક્કન અર્બન કો-ઓપરેટીવ બેન્ક લિમિટેડને નવું કોઈ રોકાણ ન કરવાની તથા પૂર્વમંજૂરી વગર નવી કોઈ જવાબદારી વહન કરવાનું પણ જણાવાયું છે. 

છ મહિના સુધી એક હજારથી વધારે ઉપાડી નહીં શકાય 

આરબીઆઈએ એક નિવેદન જારી કરીને જણાવ્યું કે  બેન્કના સીઈઓને  તેની કોઈ જવાબદારી પૂરી કરવા માટે ચુકવણી ન કરવાનો પણ નિર્દેશ અપાયો છે. આરબીઆઈએ કહ્યું કે બેન્કની હાલની કેશ તરલતાને (રોકડ રકમનો પ્રવાહ) ધ્યાનમાં લેતા કોઈ પણ કરન્ટ કે સેવિંગ અથવા તો જમાકર્તાના કોઈ બીજા કોઈ એકાઉન્ટમાંથી 1,000 થી વધારે રુપિયાના ઉપાડ પર પ્રતિબંધ મૂકવામાં આવે છે. 

ગ્રાહકો કેટલીક નિશ્ચિત શરતોને અધીન તેમની જમા રકમને આધારે લોન ભરપાઈ કરી શકે છે. જોકે બેન્કના લગભગ 99.58 ટકા ગ્રાહકો ડીઆઈસીજીસી ઈન્સોરન્સ સ્કીમથી કવર થયેલા છે.