રિઝર્વ બેન્ક ઓફ ઇન્ડિયા (RBI)ની દ્વિમાસિક મોનેટરી પોલિસી કમિટી (MPC)ની બેઠક આવતી કાલથી શરૂ થઇ રહી છે. આ ત્રિદિવસીય બેઠકમાં લેવામાં આવનાર નિર્ણયો ૫ ડિસેમ્બરના રોજ જાહેર કરવામાં આવશે. બેન્કર્સ અને નિષ્ણાતોનું માનવું છે કે આરબીઆઇ આ બેઠકમાં આ વખતે પણ સતત છઠ્ઠી વખત રેપો રેટમાં ઘટાડો કરવાની જાહેરાત કરી શકે છે.
બેઠકમાં લેવામાં આવનાર નિર્ણયો ૫ ડિસેમ્બરના રોજ જાહેર કરવામાં આવશે
આરબીઆઇ સતત છઠ્ઠી વખત રેપો રેટમાં ઘટાડો કરવાની જાહેરાત કરી શકે છે
હાલકડોલક અર્થતંત્ર અને ઘટતા જતા ઇકોનોમિક ગ્રોથને સપોર્ટ આપવા માટે આરબીઆઇ આ વખતે પણ પોલિસી રેટમાં ૨૫ બેસિસ પોઇન્ટ એટલે કે ૦.૨૫ ટકાનો કાપ મૂકી શકે છે. એક આર્થિક અખબાર દ્વારા હાથ ધરાયેલા સર્વેમાં ૨૧ લોકોએ ભાગ લીધો હતો અને તેમના અનુમાન મુજબ આરબીઆઇ છઠ્ઠી વખત સતત પોલિસી રેટમાં ૦.૨૫ ટકાનો ઘટાડો કરશે.
આ વર્ષે ફેબ્રુઆરીથી ઓક્ટોબર સુધી યોજાયેલી પાંચ બેઠકોમાં આરબીઆઇ રેપો રેટમાં સતત પાંચ વખત કાપ મૂકી ચૂકી છે. પાંચમી વખતે રેપો રેટમાં કુલ ૧.૩૫ ટકાનો ઘટાડો કરવામાં આવ્યો હતો તેમ છતાં અર્થતંત્રની સ્થિતિમાં સુધારાના કોઇ સંકેત દેખાતા નથી.
હાલ રેપો રેટ ૫.૧૫ ટકાના દરે છે. એચડીએફસી બેન્કના મુખ્ય અર્થશાસ્ત્રી અભિક બરૂઆએ જણાવ્યું છે કે હવે ફોકસ માત્ર રેટ કટ પર જ નહીં, પરંતુ તેનો ફાયદો છેવાડાના સ્તર સુધી પહોંચાડવા પર રહેશે. વધુ ફ્લોટિંગ લોન રેટ્સને બેન્ચમાર્ક રેટ સાથે લિંક કરવાની કવાયત થઇ શકે છે. મની માર્કેટમાં પણ રેટ પોલિસી રેટમાં થઇ રહેલા ઘટાડાના આધારે ઘટી રહ્યા છે.
આ વર્ષે જાન્યુઆરીથી અત્યાર સુધીમાં આરબીઆઇ રેપો રેટ ૧૩૫ બેસિસ પોઇન્ટ ઘટી ચૂક્યો છે અને હજુ આ બેઠકમાં ૨૫ બેસિસ પોઇન્ટનો ઘટાડો થશે.