ઓનલાઈન બેન્કિંગ ટ્રાન્ઝેક્શનમાં ફ્રોડને રોકવા માટે રિઝર્વ બેન્ક ઓફ ઇન્ડિયા હવે તેમાં કેટલાક નવા વધુ ફિચર્સ જોડવાની તૈયારીમાં છે. આ અંગે આરબીઆઇને નાણાં મંત્રાલય અને વિવિધ બેન્કો સાથે બેઠક થઇ ગઇ છે. સૂત્રોના જણાવ્યા અનુસાર હવે ઓનલાઇન બેન્કિંગ ટ્રાન્ઝેક્શનમાં ઓટીપી ઉપરાંત ફેસિયલ રેકગ્નિશન અને લોકેશન જેવા સિક્યોરિટી ફિચર્સ પણ જોડવામાં આવશે.
ઓનલાઈન બેંકિગ હવે થશે વધુ સુરક્ષિત
નવા સિક્યોરિટી ફીચર્સ આવી શકે છે
ફેસિયલ રિકગનિશન ફીચર જોડાઈ શકે છે
હવે જો તમે ઓનલાઇન બેન્કિંગ ટ્રાન્ઝેક્શન કરશો તો ઓટીપીની સાથે સાથે તમારે તમારો ચહેરો પણ બતાવવો પડશે અને ટ્રાન્ઝેક્શનનું લોકેશન પણ જણાવવું પડશે. હવે માત્ર ઓટીપીના આધારે ઓનલાઇન બેન્કિંગ ટ્રાન્ઝેક્શન થઇ શકશે નહીં.
ઓનલાઇન બેન્કિંગ ટ્રાન્ઝેક્શન દરમિયાન ઓટીપી ઉપરાંત ફેસિયલ રેકગ્નિશન, આઇરિસ (આંખની કીકી) અને લોકેશન પણ માગવામાં આવશે અને ત્યારે જ તમારું ટ્રાન્ઝેક્શન પૂરું થશે. અત્યારે ટુ ફેક્ટર ઓથેન્ટિકેશન (૨એફએ)નો ઉપયોગ થાય છે. ૩-ડી પિન અને ઓટીપીથી ટ્રાન્ઝેક્શન પૂર્ણ થાય છે, પરંતુ હવે નવા સિક્યોરિટી ફીચર્સ જોડવામાં આવશે અને ત્યાર બાદ જ ઓનલાઇન ટ્રાન્ઝેક્શન થઇ શકશે.
અહેવાલો અનુસાર દેશમાં પાઇલટ પ્રોજેક્ટ તરીકે તેની શરૂઆત બેંગલુરુ, મુંબઇ અને પુણે જેવાં શહેરોથી થઇ રહી છે. એક વર્ષની ટ્રાયલ બાદ પ્રથમ તબક્કામાં દેશના મેટ્રો શહેરોમાં તેની શરૂઆત કરવામાં આવશે. નવી સિસ્ટમ મુજબ સમગ્ર ટેક્નિકનું સંપૂર્ણ ફોકસ ઓટીપીના બદલે વ્યક્તિના ચહેરા અને આંખની કીકી પર રહેશે. તેના દ્વારા ખાતાધારકના ચહેરાને મોબાઇલ અથવા કમ્પ્યૂટરના કેમેરા દ્વારા મેચ કરાશે અને સાથે જ આંખની કીકીને પણ મેચ કરાશે અને ત્યાર બાદ જ ઓનલાઇન ટ્રાન્ઝેક્શન મંજૂર કરવામાં આવશે.