તમારા કામનું / હવે બેંકમાં લોકર ખોલાવવું બન્યુ વધુ સુરક્ષિત, RBIએ કર્યા નિયમોમાં ફેરફાર, જાણો વિગત

• RBI દ્વારા બેંકમાં લોકર ખોલવાના નિયમોમાં કર્યો ફેરફાર
• બેંકમાં લોકર હોવુ હવે વધુ સુરક્ષિત
• 1લી જાન્યુઆરી,2022થી નવા નિયમો અમલી બન્યા 

રિઝર્વ બેંક ઓફ ઈન્ડિયા (RBI) દ્વારા બેંક ગ્રાહકોને ધ્યાનમાં રાખીને નવા નિયમો બનાવવામાં આવી રહ્યા છે. હાલમાં જ કેન્દ્રીય બેંક દ્વારા લોન આપવાના નિયમોમાં ફેરફાર કર્યા બાદ હવે આરબીઆઈએ બેંક લોકરના નિયમોમાં ફેરફાર કર્યો છે. જો તમે કોઈ બેંકમાં લોકર ખોલ્યું છે અથવા તેને ખોલવાનું વિચારી રહ્યા છો, તો આ સમાચાર તમારા માટે ખૂબ મદદરૂપ છે.

આ નિયમો 1 જાન્યુઆરી, 2022થી અમલી 

RBIએ એક નોટિફિકેશન જાહેર  કરતા જણાવ્યું કે  નવા બેંક લોકર નિયમો 1 જાન્યુઆરી, 2022થી લાગુ કરવામાં આવશે. બેંકમાં લોકર લેતા ગ્રાહકોની ફરિયાદ પર આરબીઆઈએ આ નિયમો જાહેર કર્યા છે. નવા નિયમોના અમલીકરણનો સીધો ફાયદો બેંક ગ્રાહકોને મળશે.

100 ગણું વળતર આપવું પડશે

અવારનવાર બેંકના લોકરમાં ચોરીની ફરિયાદો ઉઠતી હતી. પરંતુ હવે જો બેંક લોકરમાંથી કંઈ પણ ચોરાઈ જશે તો ગ્રાહકને સંબંધિત બેંક વતી લોકરના ભાડાનું 100 ગણું વળતર આપવામાં આવશે. અત્યાર સુધી બેંકો ચોરીની ઘટનાને નજરઅંદાજ કરતી હતી અને કહેતી હતી કે તેઓ તેના માટે જવાબદાર નથી.

ડિસ્પ્લે પરથી ખાલી લોકરની માહિતી મળશે

આરબીઆઈએ પોતાના આદેશમાં એમ પણ કહ્યું કે બેંકોએ ખાલી લોકરની યાદી, લોકર માટે વેઈટીંગ લિસ્ટ નંબર ડિસ્પ્લે પર લગાવવો પડશે. તેનાથી લોકર સિસ્ટમમાં વધુ પારદર્શિતા આવવાની અપેક્ષા છે. આરબીઆઈનું માનવું છે કે બેંકો ગ્રાહકને અંધારામાં રાખી શકતી નથી. તેમને યોગ્ય માહિતી મેળવવાનો અધિકાર છે.

ઈ-મેલ અને SMS દ્વારા એલર્ટ અપાશે 

હવે જ્યારે પણ તમે તમારા લોકરને એક્સેસ કરશો, તે તમને બેંક દ્વારા ઈ-મેલ અને SMS દ્વારા એલર્ટ કરવામાં આવશે. RBI દ્વારા કોઈપણ પ્રકારની છેતરપિંડીથી બચવા માટે આ નિયમ બનાવવામાં આવ્યો છે.

બેંક મહત્તમ ત્રણ વર્ષ માટે ભાડું લઈ શકશે 

નવા નિયમો હેઠળ બેંકોને મહત્તમ ત્રણ વર્ષ સુધીનું લોકર ભાડં લેવાનો અધિકાર છે. જો તમારા લોકરનું ભાડું રૂ. 2000 છે તો બેન્ક તમારી પાસેથી અન્ય મેન્ટેનન્સ ચાર્જ સિવાય રૂ. 6000થી વધુ વસૂલ કરી શકશે નહીં.

સીસીટીવી ફૂટેજ જરૂરી 

હવે લોકર રૂમમાં આવતા-જતા લોકો પર સીસીટીવી દ્વારા નજર રાખવી જરૂરી છે. તેમજ સીસીટીવી ફૂટેજનો ડેટા 180 દિવસ સુધી સંગ્રહિત કરવાનો રહેશે. ચોરી કે સુરક્ષામાં કોઈ ખામીના કિસ્સામાં હવે પોલીસ સીસીટીવી ફૂટેજ દ્વારા તપાસ કરી શકશે.