પેટ્રોલ ડીઝલની કિંમતોમાં લગાતાર થઇ રહેલા વધારાને લઈને મોદી સરકાર પર કઈંક એક્શન લેવાનું દબાણ વધ્યું છે, ત્યારે હવે આ મામલે RBIના ગર્વનરે સરકારને મોટું સૂચન કર્યું છે.
મોદી સરકાર પર કઇંક એક્શન લેવાનું દબાણ વધી રહ્યું છે
વિપક્ષ પેટ્રોલ-ડીઝલની કિંમતોને લઈને સરકાર પર પ્રહાર કરી રહ્યું છે
પેટ્રોલ-ડીઝલના ભાવમાં લાગેલી આગના કારણે દેશનો આમ આદમી ત્રાહિમામ પોકારી ઉઠ્યો છે, વિપક્ષ આ મુદ્દાને આગળ ધરીને મોદી સરકાર પર માછલાં ધોવાનું કામ કરી રહ્યું છે, જેને લઈને સરકાર પર હવે કઈંક નક્કર કરવાનું દબાણ વધી રહ્યું છે, ત્યારે હવે આ મુદ્દે સરકારને મદદ કરવા માટે આરબીઆઇના ગવર્નર આગળ આવ્યા હતા અને તેમણે સરકારને આંતરિક ટેક્સમાં ઘટાડો કરીને પેટ્રોલ-ડીઝલની કિંમતોમાં લોકોને રાહત આપવાનું સૂચન કર્યું છે.
સરકાર આંતરિક ટેક્સમાં ઘટાડો કરીને કિંમતોને કાબૂમાં કરી શકે છે
આરબીઆઇના ગવર્નર શક્તિકાંતા દાસે કેન્દ્ર અને રાજ્ય સરકારોને અપીલ કરી છે કે તેઓ ઇન્ટર્નલ ટેક્સમાં ઘટાડો કરીને ઓઇલની કિંમતોને કાબૂમાં કરી શકે છે, સરકારને સૂચન કરતા તેમણે કહ્યું હતું કે ધીરે ધીરે આમાં ઘટાડો કરીને આ કિંમતોને કાબૂમાં કરવામાં આવે, જેનાથી અર્થતંત્ર ઉપરથી આ વધેલા ભાવોનું દબાણ ઓછું કરી શકાય.
મોંઘવારીને લઈને દર્શાવી ચિંતા
આરબીઆઇની મૌદ્રિક નીતિની બેઠકમાં વાત કરતા મોંઘવારીને લઈને ચિંતા દર્શાવતા કહ્યું હતું કે રિટેલ મોંઘવારી દર ખાદ્ય અને ઇંધણને હટાવવા છતાં પણ ડિસેમ્બરમાં 5.5 ટકાની ઉપર રહી હતી, ક્રૂડ ઓઇલની કિંમતો અને પેટ્રોલ- ડીઝલના ભાવોમાં આ ડાયરેક્ટ ટેક્સના લીધે મુખ્ય સામાન અને સેવાઓની કિંમતો વધી ગઈ છે.
રોજ વધી રહી છે કિંમતો
પેટ્રોલ-ડીઝલની કિંમતોમાં છેલ્લા ઘણા સમયથી વધારો નોંધાઈ રહ્યો છે, દિલ્હીમાં પેટ્રોલના ભાવ વધીને 90.93 થઇ ગયા છે, સાથે જ ડીઝલના ભાવ 35 પૈસા વધીને 81.32 રૂપિયા લીટર પહોંચી ગયા છે.
નાગાલેન્ડમાં ટેક્સ ઓછો કરવામાં આવ્યો
હાલમાં દેશના પૂર્વોત્તર રાજ્યોમાં પેટ્રોલ-ડીઝલના ભાવને લઈને સામાન્ય માણસને રાહત આપવા માટે કિંમતોમાં ઘટાડો કરવામાં આવ્યો છે, અત્યાર સુધીમાં આસામ, મેઘાલય અને હવે નાગાલેન્ડમાં પણ આવી રાહત આપવામાં આવી છે, અહીં પેટ્રોલ પર ટેક્સનો રેટ 29.80% થી ઘટાડીને 25% કરી નાખવામાં આવ્યો છે, એટલે કે આ રૂપિયામાં ટેક્સ 18.26થી ઘટાડીને 16.04 કરી નાખવામાં આવ્યો છે. જ્યારે કે ડીઝલમાં ટેક્સ 11.08 રૂપિયાથી ઘટાડીને 10.51 રૂપિયા કરી નાખવામાં આવી છે.