આનંદો / છવાઇ ગયો ડિજિટલ રૂપિયોઃ પહેલા જ દિવસે બમ્પર લેવડદેવડ.. જાણો આંકડો

• RBIની ડિજીટલ કરન્સી CBDCની મંગળમય શરૂઆત થઇ
• લોન્ચિંગના પહેલા દિવસે 275 કરોડ રૂપિયાની લેવડ-દેવડ 
• દરેક વ્યક્તિને કરન્સીના ઉપયોગની મંજૂરી મળી શકે

આ પાયલોટ પ્રોજેક્ટમાં 9 બેંકોનો સમાવેશ થાય છે

RBIની ડિજીટલ કરન્સી CBDCની મંગળવારે મંગળમય શરૂઆત થઇ છે. પાયલોટ પ્રોજેક્ટ તરીકે પહેલા માત્ર હોલસેલ સેગમેન્ટમાં બેંકોને સરકારી જામીનગીરી એટલેકે સરકારી સિક્યોરિટીની લેવડ-દેવડ માટે આ કરન્સીના ઉપયોગની મંજૂરી મળી છે. આ પાયલોટ પ્રોજેક્ટમાં 9 બેંકોનો સમાવેશ થાય છે. જેમાંથી ઘણી બેંકોએ પહેલા દિવસે ડિજીટલ વર્ચ્યુઅલ કરન્સીનો ઉપયોગ કરીને સરકારી બોન્ડ સાથે જોડાયેલા 48 કરાર કર્યા. જેનુ કુલ મૂલ્ય 275 કરોડ રૂપિયા છે. 

ડિજિટલ કરન્સી હશે સુપરહિટ 

ભારતમાં હાલમાં પાયલોટ પ્રોજેક્ટ તરીકે ડિજિટલ કરન્સીનો ઉપયોગ કરવામાં આવી રહ્યો છે. ઘણા તબક્કામાં આ પાયલોટ પ્રોજેક્ટ આગળ વધારવામાં આવશે અને બધી ખામીઓને દૂર કર્યા બાદ દરેક વ્યક્તિને આ કરન્સીના ઉપયોગની મંજૂરી મળી શકે છે. શરૂઆતમાં જે 9 બેંકોને તેમાં ભાગ લેવાની મંજૂરી મળી છે, તેમાં સ્ટેટ બેંક ઑફ ઈન્ડિયા, બેંક ઓફ બરોડા, યુનિયન બેંક ઑફ ઈન્ડિયા, HDFC બેંક, ICICI બેંક, કોટક મહિન્દ્રા બેંક, યસ બેંક, IDFC ફર્સ્ટ બેંક અને HSBC બેંકનો સમાવેશ થાય છે. પહેલા દિવસે કુલ 275 કરોડના ટ્રાન્જેક્શનને એક સારી શરૂઆત જણાવવામાં આવી રહી છે અને અનુમાન છે કે આગામી દિવસોમાં ડિજિટલ કરન્સી પોતાની જગ્યા સ્થાપિત કરવામાં સફળ રહેશે. આ સાથે સરકાર જે હેતુની સાથે તેને લાગુ કરવા માંગે છે, તે પણ પૂર્ણ થવાની ભરપૂર સંભાવના છે. 

RBIએ ઓક્ટોબરમાં પાયલોટ પ્રોજેક્ટ લાવવાની કરી હતી જાહેરાત

ઓક્ટોબરમાં આરબીઆઈએ જાહેરાત કરી હતી કે તે ડિજિટલ કરન્સીના વિશેષ ઉપયોગ માટે જલ્દી એક પાયલોટ પ્રોજેક્ટ લાવશે. આ ઉપરાંત RBIએ CBDC પર એક કોન્સેપ્ટ નોટ પણ જાહેર કરી હતી. જે ડિજિટલ કરન્સી અંગે જાગૃતિ ઉભી કરવાના ઉદ્દેશ્યથી લાવવામાં આવી હતી.