રાહત / વાહન ચાલકો માટે ખુશીના સમાચાર, RBIએ FASTagsથી જોડાયેલ આ નિયમ બનાવ્યા સરળ

• વાહન ચાલકોની સુવિધા માટે RBIએ નિયમોમાં કર્યા ફેરફાર
• સરળતાથી ફાસ્ટેગ રિચાર્જ કરી શકશે વાહન ચાલકો
• ઓનલાઈન પેમેન્ટની સુવિધામાં કર્યો વધારો

RBIએ નિયમો બનાવ્યા સરળ

હવે તમે UPI, એટીએમ અને ક્રેડિટ કાર્ડ્સ, પ્રી-પેડ ઇન્સ્ટ્રૂમેન્ટ્સથી પણ ફાસ્ટેગને રિચાર્જ કરી શકો છો. 
30 ડિસેમ્બર, 2019ના રોજ આરબીઆઈ દ્વારા જારી કરાયેલા એક નિવેદનમાં કહેવામાં આવ્યું છે કે ગ્રાહકો તેમના ફાસ્ટેગ એકાઉન્ટ્સને પેમેન્ટ માટેના તમામ અધિકૃત મોડલ અને ચૂકવણીના સાધનો સાથે લિંક કરી શકે છે. આમાં UPI એકાઉન્ટ્સ અને મોબાઈલ વોલેટ્સ પણ સામેલ હશે. આ પગલું એકાઉન્ટ્સને રિચાર્જ કરવામાં સરળતા વધારવા અને ફેલ્ડ ટ્રાન્ઝેક્શન્સના મામલા ઝડપથી હલ કરવા માટે આ લેવામાં આવશે. આરબીઆઈએ કહ્યું છે કે, 'ગ્રાહકોને વધુ ચૂકવણીના વિકલ્પો આપીને આ સિસ્ટમનો વ્યાપ વધારવા અને સિસ્ટમ સહભાગીઓમાં હરીફાઈ વધારવાના હેતુથી, હવે તમામ અધિકૃત ચૂકવણી સિસ્ટમને ફાસ્ટેગ સાથે લિંક કરવાની મંજૂરી આપવામાં આવશે.

સરળતાથી ફાસ્ટેગ રિચાર્જ કરી શકશે વાહન ચાલકો

થોડાં દિવસ પહેલાં ભારતીય રાષ્ટ્રીય ચૂકવણી નિગમ (NPCI)એ ગ્રાહકોને ભીમ યૂપીઆઈ સાથે એનઇટીસી ફાસ્ટેગ રિચાર્જ કરવાનો વિકલ્પ ઉપલબ્ધ કરાવ્યો હતો. એનપીસીઆઇએ જણાવ્યું હતું કે, ભીમ યૂપીઆઈ આધારિત મોબાઈલ એપ દ્વારા વાહન માલિકો રસ્તામાં હોવા છતાં તેમનો ફાસ્ટેગ રિચાર્જ કરી શકશે અને તેમને ટોલ પ્લાઝા પર લાંબી લાઈનોમાં ઊભા રહેવાની જરૂર નહીં પડે.

શું છે ફાસ્ટેગ?

ફાસ્ટેગ એ એવી વ્યવસ્થા છે જેમાં રેડિયો ફ્રિકવન્સી આઈડેન્ટીફિકેશન ટેક્નોલોજી (RFID)નો ઉપયોગ કરવામાં આવ્યો છે. જેમાં ટોલ પેમેન્ટ સીધા તેની સાથે સંકળાયેલા પ્રી-પેડ એકાઉન્ટમાંથી થાય છે. ફાસ્ટેગને તમારા વિન્ડસ્ક્રીન ઉપર ચોંટાડવામાં આવે છે. તેના કારણે તમારા ફાસ્ટેગ સ્ટીકરની ફ્રિકવન્સી ટોલ પ્લાઝામાં લાગેલ સેન્સર સાથે મેચ થઈ જાય છે અને વાહન ચાલક ત્યાંથી સડસડાટ પસાર થઈ શકે છે. જલ્દી ફાસ્ટેગ લગાવી લો નહીં તો 15 જાન્યુઆરી બાદ કેશ લેન બંધ થઈ જશે. 

નવા વાહન માલિકોને મળશે આ સુવિધા

નવા વાહન માલિકોએ ફાસ્ટેગની ચિંતા કરવાની જરૂર નથી, કારણ કે હવે રજિસ્ટ્રેશન વખતે જ ફાસ્ટેગ ઉપલબ્ધ કરાવવામાં આવશે. માલિકે બસ ફાસ્ટેગ એકાઉન્ટ એક્ટિવ કરીને રિચાર્જ કરવું પડશે. પણ જો તમારી પાસે જૂની કાર છે તો, એવી બેંકો પાસેથી ફાસ્ટેગ ખરીદી શકો છો જે રાષ્ટ્રીય ઈલેક્ટ્રોનિક ટોલ કલેક્શન (NETC) કાર્યક્રમ દ્વારા અધિકૃત છે. જેમાં  સિન્ડિકેટ બેંક, એક્સિસ બેંક, આઈડીએફસી બેંક, એચડીએફસી બેંક, ભારતીય સ્ટેટ બેંક, આઈસીઆઈસીઆઈ બેંક અને ઇક્વિટાસ બેંકનો સમાવેશ થાય છે. તમે પેઈટીએમમાંથી પણ ફાસ્ટેગ પેમેન્ટ કરી શકો છો. તમે ફાસ્ટેગને ઓફલાઈન પણ બેંકમાં જઈને ખરીદી શકો છો. જોકેસ, લાંબી લાઈનોમાં ઊભા રહેવાથી બચવા ઓનલાઈન ખરીદવું સરળ છે. ઉપરાંત ફાસ્ટેગ અરજીની પ્રક્રિયા બેંકોમાં અલગ-અલગ છે.