ગુજરાત વિધાનસભાની ચૂંટણીને લઈ ભાજપણએ જિતદ્વા હવે ક્રિકેટર રવીન્દ્ર જાડેજા મેદાનમાં ઉતર્યા છે. રવિન્દ્ર જાડેજાના પત્ની રિવાબા જાડેજાને પણ ભાજપે ટિકિટ આપી હોઇ તેમના પ્રચારમાં જોડાયા બાદ હવે રવીન્દ્ર જાડેજાએ ડેડિયાપાડામાં ભાજપના ઉમેદવાર માટે રોડ શો યોજ્યો છે. આ રોડ શો બાદ રવીન્દ્ર જાડેજાએ સભા સંબોધતા ભાજપના ઉમેદવારને વિજયી બનાવવા આહ્વાન કર્યું હતું.
રાજ્યમાં વિધાનસભાની ચૂંટણીના ગણતરીના દિવસો પહેલા હવે દરેક પક્ષો મતદારોને રીઝવવામાં લાગ્યા છે. આ દરમ્યાન ક્રિકેટર રવીન્દ્ર જાડેજાએ નર્મદાના ડેડીયાપાડાના ભાજપના ઉમેદવારના સમર્થનમાં રોડ-શોમાં ભાગ લીધો હતો. આ સાથે મીડિયા સાથેની વાતચીતમાં તેમણે કહ્યું હતું કે, હું માત્ર પત્ની માટે જ નહીં ભાજપ માટે પ્રચાર કરીશ, આ સાથે સભા સંબોધતા ભાજપના ઉમેદવારને વિજયી બનાવવા માટે અપીલ કરી હતી. મહત્વનું છે કે, દ્વારકાના પબુભા માટે પણ રવીન્દ્ર જાડેજાએ રોડ શો કર્યો હતો.
મહત્વનું છે કે, આ પહેલા જામનગર ઉત્તર વિધાનસભાના ઉમેદવાર રિવાબા અને પતિ રવિન્દ્ર જાડેજા સાથે VTV ની ખાસ વાતચીત કરી હતી. જેમાં રિવાબાએ જીતની આશા વ્યક્ત કરતાં કહ્યું હતું કે, મારા પતિ સતત મારી જોડે છે તમામ કામ મૂકી સાથ આપી રહ્યા છે, તો બીજી તરફ રવીન્દ્ર જાડેજાએ કહ્યું પત્નીનો સાથ આપીશ.
પબુભા માણેકની રેલીમાં પણ જોડાયા હતા રવીન્દ્ર જાડેજા
તાજેતરમાં જ રવીન્દ્ર જાડેજા ચૂંટણી પ્રચાર કરવા માટે પબુભા માણેકની રેલીમાં જોડાયા હતા. આ દરમિયાન તેમણે રોડ શો કર્યો હતો. જ્યાં ક્રિકેટર રવીન્દ્ર જાડેજાને જોવા માટે યુવાનો અને ફેન્સની લાંબી લાઈનો લાગી હતી.