રેટિંગ એજન્સી ફિચના મુખ્ય અર્થશાસ્ત્રીએ કહ્યું, તાજેતરની કેટલીક ઘટનાઓએ વૈશ્વિક અર્થતંત્રને ગંભીર ફટકો આપ્યો
ફિચે નાણાકીય વર્ષ 2022-23 માટે ભારતના જીડીપી વૃદ્ધિ દરનો અંદાજ ઘટાડ્યો
2022-23 માટે ભારતના જીડીપી વૃદ્ધિ દરનો અંદાજ 7.8 ટકાથી ઘટાડીને 7 ટકા કર્યો
નાણાકીય વર્ષ 2023-24માં ભારતનો આર્થિક વિકાસ દર 6.7 ટકા રહેશે: ફિચ
રેટિંગ એજન્સી ફિચે નાણાકીય વર્ષ 2022-23 માટે ભારતના જીડીપી વૃદ્ધિ દરનો અંદાજ 7.8 ટકાથી ઘટાડીને 7 ટકા કર્યો છે. મતલબ કે, ફિચ રેટિંગ્સે તેના અગાઉના અંદાજમાં 0.8 પોઈન્ટનો ઘટાડો કર્યો છે. એટલું જ નહીં, ફિચે આગામી નાણાકીય વર્ષ માટે વૃદ્ધિ અનુમાનમાં પણ ઘટાડો કર્યો છે. રેટિંગ એજન્સીનું કહેવું છે કે, નાણાકીય વર્ષ 2023-24માં ભારતનો આર્થિક વિકાસ દર 6.7 ટકા રહેશે. જૂન 2022માં ફિચે તે 7.4 ટકા રહેવાનો અંદાજ મૂક્યો હતો.
રેટિંગ એજન્સી ફિચના મુખ્ય અર્થશાસ્ત્રી બ્રેઈન કલ્ટન કહે છે કે, તાજેતરની કેટલીક ઘટનાઓએ વૈશ્વિક અર્થતંત્રને ગંભીર ફટકો આપ્યો છે. જો યુરોપમાં ગેસ સંકટ છે, તો ઘણા દેશોની મધ્યસ્થ બેંકોએ વ્યાજ દરમાં વધારો કર્યો છે. જેના કારણે વિવિધ પ્રકારની કટોકટી ઊભી થઈ છે. તેવી જ રીતે ચીનની પ્રોપર્ટી કટોકટી પણ વૈશ્વિક અર્થતંત્ર પર નકારાત્મક અસર કરી રહી છે. બ્રેઈન કહે છે કે કુદરતી ગેસની અછત યુરોઝોનની અર્થવ્યવસ્થાને ખૂબ અસર કરી રહી છે.
એજન્સીનું કહેવું છે કે, નાણાકીય વર્ષ 23 માં વૈશ્વિક અર્થતંત્ર 2.4 ટકાના દરે વૃદ્ધિ કરશે. રેટિંગ એજન્સીનો અંદાજ છે કે 2023માં તે 1.7 ટકા સુધી રહી શકે છે. રેટિંગ એજન્સીનું કહેવું છે કે નાણાકીય વર્ષ 2023ના મધ્યમાં યુએસને હળવી મંદીનો સામનો કરવો પડશે. તે જ સમયે, બ્રિટન અને યુરોઝોન આ વર્ષે મંદીની પકડમાં રહેશે.