ચૂંટણી / વંથલીમાં NCP ઉમેદવાર રેશમા પટેલ પર અજાણ્યા શખસે કર્યો હુમલો

હાર્દિક પટેલને એક બાજુમાં લાફો પડ્યો છે ત્યારે તેની જૂના સાથી રેશમા પટેલ પર કેટલાક શખ્સોએ હુમલો કર્યો છે. પાટીદાર અનામત આંદોલનમાં હાર્દિક પટેલના સાથી અને વિધાનસભાની ચૂંટણી પહેલાં હાર્દિકનો સાથ છોડીને ભાજપમાં જોડાઇ ગયેલ રેશમા પટેલે તાજેતરમાં ભાજપમાંથી રાજીનામું આપીને રાજકીય પક્ષપલટો કર્યો છે અને એનસીપીમાં જોડાયા છે.

વિધાનસભાની માણાવદર બેઠકની પેટાચૂંટણીમાં રેશમા પટેલ એનસીપીનાં ઉમેદવાર છે. આજે સવારે રેશમા તેના કાર્યકર્તાઓ સાથે વંથલી ગામમાં પ્રચાર માટે ગયાં હતાં ત્યારે કેટલાંક તોફાની તત્ત્વોએ તેના પર હુમલો કર્યો હતો. રેશમા પર હુમલો થતાં તેને હોસ્પિટલમાં સારવાર માટે ખસેડવામાં આવ્યાં હતાં. રેશમા પટેલ પર હુમલો થતાં તેમણે ભાજપ પર નિશાન ટાંક્યું હતું અને ભાજપના ઇશારે હુમલો થયો હોવાના આક્ષેપ કર્યો હતો. આ બંને ઘટનાના પગલે લોકસભાની ચૂંટણીના પ્રચારમાં હવે વધુ રાજકીય ગરમાવો આવે તેવી શક્યતા છે.
 
સુરેન્દ્રનગરના બલદાણામાં જન આક્રોશ સભામાં ભાષણ કરી રહેલા કોંગેસના સ્ટાર પ્રચારક હાર્દિક પટેલને એક યુવકે સ્ટેજ પર ચઢીને તું ૧૪ લોકોને ભરખી ગયો છે તેમ કહીને લાફો ઝીંકી દેતાં ચકચાર મચી ગઇ છે. જ્યારે જૂનાગઢના વંથલી ગામમાં આજે વિધાનસભાની માણાવદરની પેટાચૂંટણીના પ્રચાર માટે નીકળેલ એનસીપીના ઉમેદવાર રેશમા પટેલ પર હુમલો થયો છે.

આજે સવારે સુરેન્દ્રનગરમાં આવેલ બલદાણામાં હાર્દિક જન આક્રોશ સભા સંબોધતા હતા ત્યારે સ્ટેજ પર એક યુવક દોડી આવ્યો હતો અને ભરસભામાં હાર્દિકને લાફો ઝીંકી દીધો હતો. સ્ટેજ ઉપર હાજર કોંગ્રેસના કાર્યકરોએ યુવકને ઝડપી લીધો હતો અને માર મારવાનું શરૂ કર્યું હતું.