અફઘાનિસ્તાનના લેગ સ્પિનર રાશિદ ખાન માટે ગઈ કાલનો દિવસ બહુ સારો ના રહ્યો. તે વર્લ્ડકપની મેચમાં સૌથી વધુ રન દેનારો બોલર બની ગયો. રાશિદે ઈંગ્લેન્ડ સામે રમાયેલી મેચમાં નવ ઓવરમાં ૧૧૦ રન આપ્યા. આ પહેલાં વર્લ્ડકપની કોઈ એક મેચમાં સૌથી વધુ રન આપવાનો રેકોર્ડ ન્યૂઝીલેન્ડના માર્ટિન સ્નેડનના નામે હતો.
જેણે ૧૯૮૩ના વિશ્વકપમાં ૧૨ ઓવરમાં બે વિકેટ ઝડપીને ૧૦૫ રન આપ્યા હતા. એ સમયે વર્લ્ડકપ ૬૦ ઓવરનો રમાતો હતો. ૨૦ વર્ષીય રાશિદ વન ડે ક્રિકેટમાં એક ઇનિંગ્સમાં સંયુક્ત રૂપે બીજો સૌથી મોંઘો બોલર પણ બની ગયો. પાકિસ્તાનના ફાસ્ટ બોલર વહાબ રિયાઝે ઓગસ્ટ ૨૦૧૬માં ઈંગ્લેન્ડ સામેની મેચમાં ૧૦ ઓવરમાં ૧૧૦ રન આપ્યા હતા.
જો આંતરરાષ્ટ્રીય વન ડે ક્રિકેટની વાત કરવામાં આવે તો સૌથી મોંઘા બોલર તરીકે ઓસ્ટ્રેલિયાના ફાસ્ટર માઇક લૂઇસનું નામ પ્રથમ સ્થાને છે. તેણે દક્ષિણ આફ્રિકા સામે ૨૦૦૬માં જોહાનિસબર્ગ ખાતે ૧૦ ઓવરમાં ૧૧૩ રન આપ્યા હતા.
રાશિદ ખાનના આવા પ્રદર્શનની આશા કોઇએ રાખી નહોતી, એવામાં ટ્વિટર પર ફેન્સ રાશિદ ખાનને ટ્રોલ પણ કરી રહ્યા છે. આપને જણાવી કે, રાશિદ ખાને ગત વર્ષે જ સૌથી નાની ઉંમરમાં આઇસીસી વનડે રેન્કિંગમાં દુનિયાનો નંબર 1 બોલર બનવાનું ગૌરવ મેળવ્યું હતું.